TŠISINYO EA HO HLOKA TŠEPO E SITOA HO TSOELA-PELE
Ka Moipone Makhemeng
La 16 Mphalane 2023
‘Muso o etelletsoeng pele ke tona-kholo Ntsokoane Sam Matekane o tobane le tšisinyo ea ho hloka tšepo o e-s’o qete selemo o busa.
Moeta-pele oa Basotho National Party, Machesetsa Mofomobe a tlatsitsoe ke mokhethoa oa Democratic Party Mootsi Lehata ba hlahletse tšisinyo ea ho hloka tšepo ho tona-kholo le ’muso oa hae ka Labohlano la 13 Mphalane 2023.
Ho sa le joalo, kajeno tulong ea ntlo, Mofomobe o ile a ema ka ntlha ea tsamaiso a makalla lipuo tsa tona-kholo Matekane tseo a li buileng thelefishining ea ‘muso kajeno. Mona ke moo Matekane a ileng a sola maparamente a bohanyetsi ka hore ba se ba qalile ka mekhoa ea bona ea ho liha mebuso ka paramenteng.
Machesetsa Mofomobe
Matekane o itse: “Sechaba sa heso, ke le hlokomelisa hore tloaelo e mona e jang mebuso e boetse e boile sekoele. Hajoale le ona oa lona ‘muso oo ke o etelletseng pele o tjametsoe ke seo se jang mebuso ebe ha e qete lilemo tse hlano tseo le o fileng oona le le bakhethi.” Ke Matekane a bolela hore maparamente a mang a sitisitse hore litlhopho-bocha li fetisoe.
Ho sa le joalo Mofomobe o ile a ema a re: “Ke ema ka ntlha ea ho makala, le ho tšoha letsoalo, le ho nyaroha, ho tsitsipana, le ho feroha matšoafo, le ho sisimoha maikutlo ke polelo e entsoeng ke mohlomphehi tona-kholo pejana kajeno.
“Hela ba heso, ha u le moetapele oa naha o lokela ho hlompha molao oa motheo. Ha oa lokela ho raha molao oa motheo ka maoto. You don’t kick the constitution hoba e u behile.
“Ntate Motsamaisi, lipolelo tseno tsa hore ha re sebelisa matla a rona a molao se ngotsoeng kahara molao oa motheo ebe hlooho ea ‘muso e raha taba eo ka lieta.
“Taba eo e fosahetse, it is uncalled for. Hore na u noele poison, u ntse u tlo shoa hosasa, hoba u ke ke oa thibela lefu la hau.” Mofomobe o rialo.
“Mohlomphehi motsamaisi oa ntlo kamor’a hore litho li eme ka lintlha tsa tsamaiso, o ile a li theola maikutlo a re li hopole hore li ka paramenteng li tlo sebetsa mosebetsi oa paramente, a re litho li theole moea hoba le ka ntle ho pholile.
“Kea le kopa ebile kea le rapela, se ke be la futhumala hakaalo hoba le ntse le le litho tsa paramente. Theolang moea re etse mosebetsi oa sechaba.” Sekhamane o itela joalo.
Kamor’a moo, Sekhamane o ile a tsebisa litho hore ho na le taba e keneng ofising ea hae ho tsoa makhotleng a molao e amanang le taba e tlo sekoa-sekoa kajeno. O ile a re o sa il’o ithuta eona ‘me o ile a khefutsa ntlo hofihlela ka hora ea bone (4pm)
Kamora khefutso, Sekhamane o bontšitse litho tsa ntlo hore mahamo a nyeoe e qetang ho kena a qholotsa ka kotloloho litaba tsa tšisinyo ea ho hloka tšepo e hlahletsoeng.
Tlohang Sekhamane, Motsamaisi oa Ntlo e Bakhethoa
O ile a hlokomelisa bahlomphehi hore ba tseba linyeoe tse peli, e leng e neng e le khahlanong le standing order, hammoho le nyeoe ea mohlomphehi Kananelo Boloetse e bile lekhotleng la maipiletso ‘me linyeoe tse joalo li ile tsa sitisa mosebetsi oa paramente ho tsoela-pele.
A bontša hore ka tsela e tšoanang le nyeoe e hlahletsoeng khahlanong le tšisinyo ea ho hloka tšepo ho ‘muso ka tsela e tšoanang ba lokela ho tlohela makhotla a qete ka eona ‘me hamorao ba tla fa eona mojao oa pele.
