MOKHETHOA OA RFP O THIBELA TŠISINYO EA HO LIA MATEKANE
Ka Moipone Makhemeng
La 16 Mphalane 2023
Mokhethoa oa Revolution for Prosperity (RFP) lebatooeng la Thaba-Moea, Lejone Puseletso o hlahletse nyeoe lekhotleng le phahameng moo a phephetsang phetiso ea tšisinyo ea ho hloka tšepo ho tona-kholo le ‘muso oa hae ke moetapele oa Basotho National Party, Machesetsa Mofomobe. Tšisinyo e tlatsitsoe ke mokhethoa oa Democratic Congress, Mootsi Lehata ‘me e kopa hore Motlotlehi a behe moeta-pele oa DC, Mathibeli Mokhothu e le tona-kholo.
Nyeoeng e ritetsoeng ke Puseletso, hara baikarabelli ke Motsamaisi oa Ntlo ea Bakhethoa, Mongoli e Moholo oa Ntlo ea Bakhethoa, tona-kholo le mekha e tšehetsang bohanyetsi joaloka DC, ABC, MEC le e meng.
Puseletso o re o hlahlela nyeoe ho phephetsa phetiso ea tšisinyo ea ho hloka tšepo ho ‘muso ka mabaka a latelang: O re temana ea 87 (5) e hlomathisitsoeng ea molao oa motheo oa 1993, e nkoe e le ka thoko ho molao oa motheo kaha e hohlana le sebopeho sa molao oa motheo ho karolo ea pele ea molao oa motheo oa 1993.
Ho feta mona, o re tsela ea ho fetisa tšisinyo ea ho hloka tšepo kahara paramente e lokela ho emisoa hofihlela taba eo e lokisitsoe kahara litlhopho-bocha (reforms). O re tsela le mokhoa oa ho fetisa tšisinyo ea ho hloka tšepo ho ‘muso e lokela ho emela hore paramente e fetise lirifomo pele e le ho tsamaisa phetiso ea tšisinyo ea ho hloka tšepo ka nepo.
Ho sa le joalo, tulong ea ntlo ea bakhethoa kajeno, motsamaisi oa ntlo Tlohang Sekhamane o tlalehetse ntlo hore ofisi ea habo e amohetse lipampiri tsa lekhotla tse buang ka nyeoe e hlalositsoeng kaholimo ‘me o laetse hore ntlo e tla emela makhotla ho mamela le ho fana ka kahlolo holima nyeoe ena pele ba ka tsoela-pele.
Nyeoe e tla mameloa ka la 30 Mphalane 2023.
