‘MASEPALA O HELETSA MEK’HUK’HU TSA BAITŠOKOLI
Ka Moipone Makhemeng
La 26 Motšeanong 2023
Basebetsi ba Maseru City Council (MCC) ho bonahetse ba tsoile letšolo kajeno lihoreng tsa hoseng ho heletsa mek’hukh’u ea baitšokoli ba sebeletsang tlas’a Lesotho High School, Maseru.
’Masepala o heletsa mek’huk’hu ea baitšokoli
Puisanong le monghali Thabiso Tauli ho hlaha Kantorong ea Mebaraka ea ‘Masepala (Marketing Master), o hlalositse se ba qhololitseng ho heletsa mek’hukh’u ea baitšokoli lebaka ke hore bao ba rekisetsa barutuoa ba Lesotho High School lithethefatsi.
O bontša hore baithuti ba hlaha le terateng ebe ba reka lithetefatsi moo. Ho tsoela-pele o supile ha a ile a ba le kopano le botsamaisi ba sekolo moo ba ileng ba teka sello sa bona ka baitšokoli bao.
Ho feta mona, o hlalositse hore ‘masepala o ile oa ba le kopano ka makhetlo le komiti ea baitšokoli lilemo tse peli tse fetileng moo ba ileng ba ba hlokomelisa hore ba tlohe moo kaha ba ipehile, ba ile ba eletsoa ho latela methati e nepahetseng ea ho fumana sebaka sa ho hoeba. O hlalositse methati e lateloang hore moitšokoli a fuoe sebaka sa ho hoeba. Ntlha ea pele, moitšokoli o loketse a be le lengolo le mo pakang hore ke moitšokoli.
Ha a tsoela-pele o hlalositse hore nakong eo moitšokoli a etsetsoang lengolo ho shejoa lintlha tse tharo ‘me tsona ke sebaka; hore na se bolokehile hakae, le hore na ha se sitisi phallo ea sephethe-phethe. Ntlha ea ho qetela ke hore na sebakeng seo mokh’ukh’u o lutseng ho sona na se nepahetse.
’Masepala o heletsa mek’huk’hu ea baitšokoli
Leha ho le joalo, Monghali Tauli o bontšitse hore eena le bo-mphato oa hae empa e le baromuoa feela ho phetha mosebetsi oa ho heletsa mek’huk’hu.
Koranta e lekile ho fumana lehlakore la phala ea MCC empa ea teha kalala kaha mohala oa eona o ne o sa fumanehe.
