BA THIBELA PULO EA PARAMENTE HAPE
La 9 Phato 2023
Mokha oa lipolotiki, Yearn for Economic Sustainability (YES) o tlatsane le Media Institute of Southern Africa (MISA) Lesotho hammoho le monna oa Mosotho Kananelo Boloetse, ba hlahletse nyeoe e potlakileng ho thibela pulo ea paramente e lokelang ho ba ka ‘Mantaha oa la 14 Phato 2023.
Baikarabelli ke Motsamaisi oa Ntlo ea Bakhethoa, Mookameli oa Ntlo ea Senate, Mongoli e Moholo oa Ntlo ea Bakhethoa, Letona la Molao, Ntlo ea Senate, Ntlo ea Bakhethoa, Motlotlehi le Ramolao e Moholo oa ’Muso.
Tlohang Sekhamane, Motsamaisi oa Ntlo ea Bakhethoa ke moqosuoa oa pele
’Muelli oa balli, Adv. Mpeli Mohlabula o batla Lekhotla le Phahameng le mamele nyeoe ena kaha e potlakile hosane mantsiboea. Har’a lethathamo la mabaka a ho thibela pulo ea paramente, balli ba re pulo e ka thoko ho molao kaha ho tsosoa bafung sehlomathiso sa setšoantšo sa molao oa motheo sa leshome le motso o mong sa 2022 (11th Amendment to the Constitution Bill of 2022).
Tebello ke hore ho qaloe bocha sehlomathiso sena ’me se thomehe paramenteng ea leshome le motso o mong ho latela temana ea 78 (2) ea molao oa motheo e seng ho tsosoe se shoeleng mabitleng kaha setšoantšo sena sa molao se shoele le paramente ea leshome.
Babelaeli ba re ho bula paramente ho tla be ho le ka thoko ho molao le ho roba litemana tsa 70 le 78 tsa molao oa motheo.
“Ho qhaloa hoa paramente ea leshome ho ne ho sa bolele hore lihlomathiso tse sa kang tsa feta ke hore li bolokuoe kae-kae sehatsetsing moo li tla khoasolloa teng. Ho qhaloa hoa paramente e shoeleng ke ho bolela hore litšoantšo tsa molao tse sa fetang li shoele. Ha se nepo ho li tsosa bafung ebe li kenngoa ka paramenteng ka fensetere ka hore ho buloe paramente ena ka la 14 Phato 2023.
“Paramente e ncha e ke ke ea tla senya nako le lichelete tsa sechaba ea tšohla le ho fetisa setšoantšo sa molao se shoeleng.” Balli ba rialo lipampiring tsa lekhotla.
