NTLO EA MAHOSANA E’A BULOA
Ka Moipone Makhemeng
La 28 Phato 2023
Mongoli e Moholo oa Ntlo ea Senate, Adv. Tšeliso Molise o ntšitse samane e potolohang ho tsebisa litho hore ho tla ba le seboka sa bobeli se khethehileng sa Paramente ea Leshome le motso o mong hosane.
“Ke laeloa mona ho le tsebisa hore tulo e khethehileng ea seboka sa paramente ea leshome le motso o le mong (e leng ho bitsa tulo nakong ea phomolo) e se e tla tšoaroa la la 29 Phato 2023 moahong oa Paramente ea khale, Maseru.
“Sena ke ho ea ka molaoana oa nakoana o hlomathisitseng molaoana oa 100 oa ntlo ea paramente. Lebaka la tulo ena ke ho ea shebana le sehlomathiso sa leshome le motso o mong sa molao oa motheo sa 2022 (Eleventh Amendment to the Constitution Bill, 2022)” Lengolo la Molise le baleha joalo.
Tsebiso ena e latela hore Ntlo e koaloe ke mookameli oa eona, Mohlomphehi ‘Mamonaheng Mokitimi ka la 17 Phato 2023 moo a ileng a bontša hore e tla buloa mohlang nyeoe e neng e qholotsa pulo ea paramente e felile makhotleng.
Ho sa le joalo, nyeoe e oele ka Labohlano moo balli ba hlotsoeng ke eona ka le reng paramente e butsoe ka nepo ho se tlolo ea molao oa motheo ho ea ka balli. Likateng tsa nyeoe li fumaneha mona ha kahlolo eona e fumaneha mona.
Ka la 14 Phato 2023, tulo e khethehileng ea pulo ea paramente e ile ea hoelehetsoa ka sepheo sa ho ea fetisa Sehlomathiso sa leshome le motso o mong sa molao oa motheo sa 2022 (Eleventh Amendment to the Cinstitution Bill, 2022) malebana le litlhopho-bocha.
