TLALEHO E NYAROSANG KA LIFEME TSE KOETSOENG
Ka Moqolotsi oa rona
La 29 ’Mesa 2023
Letona la Khoebo le Mesebetsi e Moholo, Mokhethi Shelile, o tekile tlaleho e nyarosang ka lifeme tse koetsoeng naheng ea Lesotho ho tloha ka selemo sa 2020 hofihlela joale.
Mokhethi o ne araba potso e ileng ea botsoa ke morena oa sehlooho oa Thaba-Bosiu ka boemo ba lifeme tse koetsoeng ekasitana le ho hlalosa hore ‘muso o tlo sebetsa bothata bona joang.
Ha a teka tlaleho ea hae Shelile o itse feme eo Basotho ba lahlehetsoeng ke mosebetsi ka bongata ke ea C&Y eo a reng e ne e hirile Basotho ba 2500.
Ho feta mona, Shelile o boetse ka masoabi a phatlalatsa hore feme e ‘ngoe e rahileng Basotho maling a mpa ha e koaloa ke ea Nie Sheng kaha eona e ne e hirile Basotho ba 2 200.
Ho feta mona, Basotho ba 1 368 ba ile ba lahleheloa ke mosebetsi ha feme ea Glory International e koaloa. O bile thathamisa lethathamo la lifeme tse ling tse nyenyane tse ileng tsa koaloa ka tsela ena:
Coding Company e ne e hirile batho ba 92
Fantastic Clothing e n’e hirile batho ba 815
Shoe Zone e ne e hirile ba 105.
CGM eona e hirile 785.
Jaguar Shoes e ne e hirile 119
J & S Fashions e ne e hirile 700
Asia Garments e ne e hirile 440
Ho ea ka lipalo-palo tsa tahlehelo ea mesebetsi tse tekiloeng ke letona kakaretso ea Basotho ba lutseng fatše kamora ho lahleheloa ke mosebetsi ke ba 9,124.
Ho sa le joalo, Shelile o hlaloselitse Ntlo ea Mahosona hore e le ’muso ha ba tl’o phutha matsoho ka boemo bona ba tahlehelo ea mesebetsi.
O ile a bontša hore ba tlil’o ithuta kapa ho shebana le se bitsoang Investment Climate e leng ho tla batalatsa mabala ho lumella hore maemo e be a nephatseng ho lumella batseteli ho tla sebetsa koano Lesotho.
