NYEOE E BEHA PARAMENTE TSIETSING
Ka Moipone Makhemeng
La 16 Phato 2023
Motlatsi oa Motsamaisi oa Lipuisano Ntlong ea Bakhethoa, Tšepang Tšita-Mosena tulong ea Ntlo maobane o teketse litho tsa paramente hore nyeoe e hlahletsoeng makhotleng khahlanong le tšebetso eo ba neng ba lokela ho e fetisa ea ho tsosa sehlomathiso sa molao oa motheo sa leshome le motso o mong sa 2022, e tlil’o sitisa Ntlo ho tsoela-pele. Tšita-Mosena o re lebaka ke hore tsamaiso le molao ha li lumele hore litaba tse makhotleng li tšetšethoe.
Tšita-Mosena o ile a kenya tšisinyo ea tlatsetso e tla tataisa moetela-pele oa Ntlo, Mohlomphehi Nthomeng Majara ‘me eona e ile ea atleha ho feta kaha e ananetsoe ke bongata ba maparamente.
Tšepang Tšita-Mosena, Motlatsi oa Motsamaisi oa Lipuisano Ntlong ea Bakhethoa,
Motsamaisi o ile a tekela litho hore tulong ea maoba, Ntlo ea bakhethoa ho ea ka lethathamo la tšebetso, bahlomphehi ba ne ba lokela ho tšetšetha litšisinyo tse peli e leng ho hlomathisa molaoana oa paramente oa 105 (b) esita le ho tsosa sehlomathiso sa molao oa motheo oa leshome le motso o mong sa 2022.
Tšita-Mosena o hlalositse hore sena se entsoe ho ipapisitsoe le methati e nepahetseng ea tsamaiso ea paramente hore ha tšebetso e tsoela-pele ba e tekeloe lenaneng la tsamaiso la Ntlo.
“Empa bahlomphehi kea tšepa le fumane ka marang-rang a lona supplementary order paper ‘me eona e tla tataisa tšebetso e tla etsoa ke mohlomphehi moetapele oa Ntlo. Ho ea ka standing order sa rona sa 32 (3), ke tlameha hore ke le kope le ananele kopo ena kapa tšisinyo ena hore mohlomphehi a tsoele-pele.” O teka taba joalo motlatsi oa motsamaisi oa Ntlo.
Ho sa le joalo, moeta-pele oa bohanyetsi Mathibeli Mokhothu o ile a bontša hore motsamaisi oa Ntlo o fuoe matla a hore a ka etsa molao oa nakoana oa paramente empa ha e le matla a hore a ka hlomathisa melaoana ea paramente matla a joalo a apesitsoe Ntlo feela ka komiti ea teng ea melaoana ea tsamaiso ea Ntlo. Ho feta mona, Mokhothu o bontšitse hore mosebetsi ofe kapa ofe o tlang ka Ntlong o lokela ho feta kapel’a komiti ea tsamaiso e seng taba eo motsamaisi a e entseng ea ho apesa moetapele oa Ntlo matla a komiti ea tsamaiso ea paramente.
Motsamaisi o ile a qetella ka ho fetisa tšisinyo ea hore Ntlo e khefutse ho lokisetsa maparamente ho ea thupelong ea litlhopho-bocha hoteleng ea Maseru Avani kajeno.
Leha ho le joalo, lehlakore la bohanyetsi le ile la re ho molemo hore Ntlo e koaloe hofihlela nyeoe e hlahletsoeng khotla e fela. Motsamaisi o ile a khaola khang ea ho se lumellane hoa maparamente a ‘muso le a bohanyetsi ho etsa khetho ea hore Ntlo e phomotsoe hofihlela ka la 22 Phato 2023. Ba ‘muso ba ile ba hlola bohanyetsi ka lipalo ‘me Ntlo ea phomotsoa hofihlela ka la 22 Phato 2023.
