SEPOLESA SE AMOHELA MPHO EA KOLOI
Ka Moipone Makhemeng
La 27 Phato 2023
Letona la Lekala la Puso ea Libaka, Borena, Litaba tsa Lehae le Sepolesa, Lebona Lephema o amohetse mpho ea koloi ea moetso oa Toyota Land Cruser ho tsoa k’hamphaning ea Letšeng Diamond Mine ka Labohlano la 25 Phato 2023 Ntlo-Kholo ea sepolesa Maseru.
Lebitsong la Sepolesa, Mohlahlami oa Mookameli oa sepolesa, DCP Dr. Mahlape Morai o ile a fetisa liteboho tsa bona ho k’hamphani ea Letšeng Diamond. Ha a bua lebitsong la sepolesa o buile joana;
DCP Dr. Mahlape Morai
“Lebitsong la LMPS le ofisi ea mookameli oa sepolesa, ke thabo e kholo thapameng ena ho hlalosa teboho ea rona e tebileng bakeng sa mpho ena ea koloi ho tloha Letšeng Diamond. Ho Letšeng Diamond, batho ba bangata le lik’hamphani ba lakatsa ho thusa empa ke ba seng bakae ba hlileng ba nkang mehato ea ho e etsa.
“Ke leboha haholo hore ebe u e mong oa ba seng bakae kajeno le ho ema. Re rata hore le tsebe hore re leboha hore ebe le ile la khetha ho fana ka litšenyehelo tsa lona molemong oa tšireletso ea Lesotho le LMPS haholo-holo. Hape re batla le tsebe hore tlatsetso ena e tla thusa haholo litšebeletso tsa tšireletso tse hlokehang sechabeng sohle sa Basotho.” DCP Morai o lihella likhala joalo.
Ho sa le joalo, lebitsong la K’hamphani ea Letšeng Diamond, Tšepo Hlojeng o tiiselitse Basotho ka boikarabello ba bona sechabeng ka hore nako eohle ba khutlisetsa sechabeng ka boitlamo ba bona.
O bontšitse hore taba ena ba e etsa hobane ba ithutile liqholotso tseo naha e tobaneng le tsona tsa tlhokahalo ea mesebetsi le bofuma boo Basotho ba phelang kahar’a bona. A supa hore Letšeng Diamond leha e ka ntša likheo tse likete li tharo e ananela sechaba sa Basotho se hlokang mosebetsi.
Ts’epo Hlojeng o buile lebitsong la Lets’eng Diamond Mine
“Ke tla etsa mehlala e ‘meli feela seterekeng sa Mokhotlong mane; ho na le lihoai tsa likhomo tsa lebese, le likhoho tsa mahe. Re ba tšehelitse hore leha morafo ona o se o le sieo, bona ba ‘ne ba tsoele-pele ka ho iphelisa. Ntlha ea bobeli eo re kentseng letsoho ho eona ke litabeng tsa bophelo. Le tla hopola nakong ea kholumo-lumo ea Covid 19, morafo oa Letšeng o ile oa etsa tlatsetso ka liente le ambulance ea lekala la bophelo.
“Lefapha le leng la boraro leo re keneng kahare ho lona ke la thuto. Le tla ithuta hore selemo le selemo re hloaea bana ba Basotho bao re ba fang lihlapiso mafapheng a fanang ka thuto e matlafatsang ea lihloliloeng boemong ba thuto e phahameng.” Hlojeng o li beha joalo.
O boetse a bontša hore litabeng tsa botlokotsebe moo monyetla o leng teng ba kenya letsoho. O ile a khutlisetsa sechaba morao lilemong tse peli kapa tse tharo tse fetileng moo a bontšitseng hore ba ile ba nehelana ka setsi sa sepolesa Letšeng.
O totobalitse hore tšebetsong ea bona le sepolesa ba ithutile hore liqholotso li ngata ntlheng ea hore ho sebetsoe botlokotsebe ba ho nyamela kapa ho utsuoa hoa litaemane.
“Boholo ba nako e tla re ha re sebetsa le lona ‘moho re fumane hore qholotso e teng ea hore mapolesa a il’o fihla sebakeng seo e ka ‘nang eaba tlolo ea molao e etsahetse teng. ‘Me ke ka hona re ileng ra ikeletsa hore hammoho le ba neng ba ameha na re ka etsa tlatsetso efe. Tlatsetso ea rona kajeno ke hore re fane ka koloi ena.” Hlojeng o libehile ka tsela ena.
Khabareng mohlomphehi Lephema le eena o ile a lebohela sepolesa ‘me a bontša hore Letšeng Diamond e nanabetsa letsoho hangata toantšong ea botlokotsebe.
Lebona Lephema
“Ke thabetse ho tlaleha hore tšebetsong ‘moho ea rona le LMPS re thehile sehlopha sa mapolesa a koetlisitsoeng haholo a khonang ho hloa likoloi tsa litšebeletso tsa sepolesa le ho ba kenya lithutong tsa kamehla tsa tšireletso.
“Ntlha ea bobeli re tšepisa ho kenya tšebetsong tsamaiso e nepahetseng ea ho hlahloba le ho beha leihlo tšebeliso ea motsamao oa likoloi tsena ka hona re tšepisa hore kamora lilemo tse tharo ha u fihla u tla fumana koloi ea hau e le maemong a matle joalokaha e le teng hona joale.
“Ke kopa likhoebo tse ling ho tla kenya letsoho joalokaha Letšeng Diamond e bontšitse hoba moketa ho tsosoa o itekang.” Lephema o rialo a amohela koloi.
