MOKHOTHU O LOHOTHA HO QOSA BOTSAMAISI BA PARAMENTE
La 31 Motšeanong 2023
Moetapele oa Democratic Congress (DC) mohlomphehi Mathibeli Mokhothu o re eena le bo-mphato oa hae ha ba khotsofalla qeto ea motlatsi oa motsamaisi oa lipuisano Ntlong ea Bakhethoa – Tšepang Tšita-Mosena ea ho ba hanela ho botsa tona-kholo lipotso tsa tsome maobane.
Monghali Mokhothu o ile a tsitlalla hore ho ea ka melaoana ea tsamaiso ea Ntlo, maparamente a na le matla a ho botsa tona-kholo lipotso e le Labobeli khoeling, moo lipotso tseo li tla behoa ho tona-kholo e sa li tsebisoa pele.
“Temana ea 27 (1) e ea totobatsa hore tona-kholo e tla botsoa lipotso nako e sa feteng metsotso e 25.” Mokhothu o rialo.
Ho ea ka Lenane la Tsamaiso la Ntlo ea Bakhethoa maobane maparamente a ne a lokela ho botsa tona-kholo Sam Matekane lipotso tsa tsome. Qeto ea motsamaisi oa lipuisano e bile hore tona-kholo e lokela ho tsebisoa lipotso li ngoloe fatše a li fuoe pele a nt’o itlhophela ho araba.
Khang ea Motlatsi oa Motsamaisi e bile hore litona-kholo tse fetileng li ne li araba lipotso tse ngotsoeng ‘me a re ho se ho tla sebetsoa ka oona mokhoa oo.
“Ho’a nepahala hore haeba le tšepela bahlomphehi matona le ba fa monyetla oa ho araba lipotso tse ngotsoeng. Empa ha e lebane le mohlomphehi tona-kholo ha e bolele hore lipotso li kene kahare ho Order Paper feela lipotso tseo on the matter of precedence mohlomphehi a li fumane pele a tsebe ho li araba ka toka. That is my ruling. Ha ke ne ke le tataisa e ne e le hore ka nako ena ebe o se a li tsebile ebe o li arabile.
“Ha ke na lumela hore tona-kholo a arabe lipotso from his head without proper consultation. Ke boikarabello ba ka ho bona hore lipuisano ka ntlong ena e-ba tsa boleng bo holimo. Ha ke na tla fetola precedence e beiloeng ke eona ntlo ena.” Mohlomphehi Tšita-Mosena o rialo.
Ka lehlakoreng le leng, Mokhothu o re ba se ba hlahletse tlhahiso e phephetsang qeto ea hae ka le reng o tsoile melaoana ea Ntlo fatše. “Re tlo vouta ka mono ‘me rea tseba maparamente a ‘muso a tlo sireletsa hore ho tloloe molao ono. Ha re tloha moo re ea makhotleng a molao ho ea phephetsa qeto ena. Re batla lekhotla le il’o ba soaea mohlare.” Mokhothu o rialo.
Ho sa le joalo, moetapele oa Basotho National Party (BNP), Machesetsa Mofomobe o ile a tlatsana le Mokhothu a ema ka Ntlha ea Tsamaiso a re ba phephetsa qeto ea motsamaisi ‘me ha ba qeta moo ba tlil’o fetela makhotleng a molao ho tsoela-pele ka taba ena.
“Khotla mono motlatsi oa motsamaisi re se ntse re u joetsa hore khotla teng re il’o u hlola. Mona ha ho khoho, ke masiba feela, joale a sireletseng masiba ao.” Ke Mohlomphehi Mofomobe a otla ntja ka lesapo khahlanong le tona-kholo.
