SEPOLESA SE KHATHA TEMA NYEOENG EA POLAO EA MATABANE
La 30 Motšeanong 2023
Sepolesa sa Lesotho se tlaleha hore ‘melaelloa eo se neng se ntse se ‘matla, Mokomane ‘Qoqotho’ Salemone Moisa oa Mauteng Ha Sanaha, Maseru o inehetse sepoleseng bekeng ena.
Sepolesa se re ‘melaelloa enoa o tla hlaha khotla ka qoso ea ho bolaea mookameli oa Naleli Funeral Planners, mofu ntate Ikhetheleng Matabane (oa Lower Thamae, Maseru) ea ileng a thunyetsoa lefu hammoho le Tšoana Molefe (oa Sekamaneng, Berea) ka la 10 Hlakola 2023, ba le khoebong ea thekiso ea lijo The Deck, Maseru.
Babali ba tla hopola hore banna ba babeli ba ne ba bonoe ba kena khoebong eo ba fihla ba thunya bobeli boo, ba nt’o tsoa le moo ba keneng le teng. Likhatiso tsa CCTV li ba hlahisitse ba palama tekesi e neng e ba emetse kantle ho khoebo kamora ho bolaea.
Kamora moo, sepolesa se ile sa qhautsa mothehi oa Naledi Funeral Planners, Thabiso Maliba ‘me sa mo hlahisa lekhotleng moo a ileng a balloa liqoso tse peli tsa polao ea Matabane le Molef. Leha ho le joalo, moqosuoa o ile a ikopela beile Lekhotleng le Phahameng ‘me moahloli ‘Maliepollo Makhetha a mo lokolla ka beile ea M2000.
Pelaelo ea sepolesa ke hore Maliba o rekile babolai ho fenetha Matabane le Molefe.
Boinehelo ba Moisa bo hlekela hore nyeoe e kene. Ka lehlakoreng le leng, sepolesa ha se e-s’o hlakisi hore na monna ea bonoeng a kena le ‘melaelloa ea inehetseng ha ba il’o bolaea eena ho etsahala’ng ka eena.
