MAPARAMENTE A HLOA MATEKANE KA LIPOTSO KAJENO
La 30 Motšeanong 2023
Tona-Kholo Sam Matekane kajeno ntlong ea Bakhethoa ba Sechaba, maparamente a tla fuoa monyetla oa ho mo hloa ka lipotso ‘me o lebeletsoe ho li araba kaofela ha maparamente a li follela a sa mo tsebisa tsona pele.
Har’a maparamente a tla mo hora-hora ka lipotso e tla ba moetapele oa Basotho Action Party (BAP) Prof. Nqosa Mahao ea tla mo botsa potso malebana le lipolao tse sehloho tse etsahalang pusong ena. Mohlomphehi Motlatsi Maqelepo eena o tla hloma tona-kholo lipotso mabapi le maikemisetso a ‘muso ka bothata ba tlhokahalo ea mesebetsi kahara naha.
Prof. Nqosa Mahao
ka le hlakoreng le leng, Mohlomphehi Letšaba eena o tla botsa tona-kholo potso malebana le merero ea ntlafatso litabeng tsa temo. Ntlheng ea litaba tsa lihloliloeng moeta-pele oa bohanyetsi, Mohlomphehi Mathibeli Mokhothu o tla botsa tona-kholo ka litaba tsa lirafshoa.
Moetapele oa All Basotho Convention (ABC), Nkaku Kabi eena o tla botsa tona-kholo ka tsa tlhahiso ea thepa lifemeng tsa Lesotho athe Mohlomphehi Malakane eena o tla botsa ka litaba tse amanang le thuto.
Moetapele oa Basotho National Party (BNP), mohlomphehi Machesetsa Mofomobe eena o tla palama tona-kholo ka lipotso a mo botse ka ntlha-kemo ea ‘muso mabapi le likamano tsa Lesotho le linaha tsa machabeng hape Mohlomphehi Leshota eena o tla phethela ka ho botsa Matekane ka litaba tsa moruo.
Lipotso tsena Matekane o tla li botsoa a sa li tsebe, ‘me o tla lokela ho sebelisa masapo-a-hlooho ho li araba ka boqhetseke.
