MANESHENALE A KOPA TŠOARELO HO MOTLOTLEHI
Ka Moipone Makhemeng
La 5 Tlhakubele 2024
Litho tse ling tsa Mokha oa Sechaba sa Basotho (Basotho National Party – BNP) li ngolletse Motlotlehi Letsie III lengolo le bontšang tšoabo le kopa tšoarelo mabapi le litaba tseo li reng moeta-pele oa Maneshenale o li ngotse leboteng la hae la marang-rang ka sepheo sa ho rohaka Motlotlehi.
“Ntate re litho tsa Mokha oa Sechaba sa Basotho tse ileng tsa utloa ka makhetlo ha moeta-pele oa rona a bua mantsoe a se nang lihlong hohang, ao re ke keng ra a pheta kae kapa kae ka lebaka la ho hloka tlhompho ha ‘ona ho uena.” Lengolo le ngolletsoeng Motlotlehi le rialo.
Ha le tsoela-pele ,lengolo le bontša litho tsena li kopa tšoarelo ho lelapa la Motlotlehi lohle le borena bohle ekasitana le sechaba sa Basotho ka kakaretso.
Leihlo la Basotho puisanong le e mong oa litho tse itekenneng lengolong, Adv. Makokoto, o hlalositse hore lipuo tseo ke tse ileng tsa buuoa ke moeta-pele oa bona leboteng la hae la marang-rang.
Motlotlehi Letsie III
Ka la 3 Pherekhong 2023, mongoli e moholo oa Motlotlehi o ile a ngolla matona a a memela likopanong ntlong ea borena bo boholo moo a neng a il’o tšohla litaba tsa tšebetso le ‘ona. Ke moo moeta-pele oa BNP a ileng a maneha lengolo la Motlotlehi leboteng la hae a ngola mantsoe a latelang: “Ra hola ra bona mehlolo.”
Makotoko o hlalosa hore mantsoe a sebelisitsoeng ke moeta-pele oa bona a ne a bontša tello hore Motlotlehi o entse mohlolo. “Ea bobeli ke nakong eane eo a neng a bua a re ho thoe ho sibolloa lequloana la litsotsi. O ne a kopanya ntate Motlotlehi, Moareka-Bishop le Tona-Kholo.” O eketsa joalo a bile a toboketsa hore BNP ke mokha o ke keng oa bua joalo.
Ho feta mona, potsong ea hore na litaba tseo ha li buuoe khale hakaale ke hobaneng ha e le hona ba kopang tšoarelo hajoale. O arabile ka hore ha motho a tlo bua litaba tsa sechaba ha a bui maikutlo a hae e le motho, ‘me maikutlo a sechaba ha a tsoe kahara anfolopo. A supa hore moeta-pele o loketse a utloe maikutlo a sechaba pele a bua.
Ho sa le joalo, Makotoko o hlalosa ba sa atamela moetapele ho mo hlokomelisa litaba tsena tse ba tšoenyang ka mabaka ao a hlalosang ka tsela e latelang:
“Re ile ra theoha re tlamme moifo oa banna ba leshome re theoha ka Leribe haeso moo ke tsoang re leba ho moeta-pele. Moifo oa rona ka hare ho oona ho ne ho na le batho ba baholo bao ka Seneshenale ba bitsoang liqhoku.
“Ha ke batle ho bua leshano, o ile a re amohela hantle ntate moeta-pele ra tšohla tseo ra ba le kopano eo re neng re nahana ha re tsoa ka moo re bile le a ‘very productive meeting‘. Ebile re itse ntate moeta-pele, litaba tsena tsa rona ha re re le hore u li arabe empa re fana ka boeletsi feela ntate.
“Re ne re makale ha re le pitsong ea pele feela eo a bileng le eona Khubetsoana mane; o ne a bue a re: ‘Le ke le ntlohelle ke nako ea ka ea ho busa.” Ke Adv. Matokoto a bile a phethela ka ho bontša ka moo moeta-pele a neng a hla a totobala ha ba le sebokeng se koaletsoeng sa Maneshenale seterekeng sa Mokhotlong.
Ha a fana ka lehlakore la hae holim’a lengolo la bo-Makotoko, monghali Mofomobe o li tšetse ka metsi: “‘Na ha ke tšabe litaba, eaba taba ee ea hore ke rohakile Motlotlehi ha e bonoe le ho utluoa ke mautloela, mapolesa, liea-le-moea le likoranta? Ke etsa khoelehetso ho sepolesa ho fuputsa taba ena.
“Haeba nka fumanoa ke le molato, oa hore ke rohakile Motlotlehi, ke tlo itokolla ke le moparamente, ke le moeta-pele oa BNP. Ke kopa mapolesa a bule nyeoe ke qosoe.”
“Ke tseba lebaka la mangolo ana, a ne a lokela ho tsoa ha ke le Hlotse, morero oa mangolo ke hore ha ho ilo kopuoa keketso ea nako ea Italy (keketso ea konteraka ea Thesele ‘Maseribane e le moemeli Italy) a be a fihlile. Ho thoe ke tlameha ho tšehetsa RFP ka khang. Nke ke ka etsa joalo.” Ke Mofomobe a bua seea-lemoeeng sa Tšenolo FM kajeno.
