LEKHOTLA LA MATONA LEA ATOLOSOA
Ka ‘Matlhohonolofatso Lebesa
La 9 Pulungoana 2023
‘Muso o etelletsoeng pele ke mokha oa Revolution for Prosperity (RFP) o ile oa theha selekane sa puso le mekha ea Alliance of Democrats le Movement for Economic Change. Sena ke kamora ho hloloa ho ba le litulo tse ka thehang ‘muso ngoahola. E le ho fokotsa litjeo, RFP e ile ea tšepisa ho fokotsa palo ea matona eaba puso e tsamaisoa ke matona a 15.
Motlatsi Maqelepo o nka kano e le letona la Bohahlaoli, Lipapali, Bonono le Bochaba
Baeti ba neng ba lebeletse tlhapants’o ea matona
Leha ho le joalo, tšisinyo ea ho hloka tšepo ho ‘muso e qobelletse RFP ho kopanela puso le mekha e meng hape. Morero e bile ho fereha mekha eo ho eketsa litulo ka paramenteng kaha bohanyetsi bo ne bo se bo imela ‘muso. Ketso ena e bile ho qoba selepe sa ho ketoloa hoa ‘muso ke bohanyetsi. Mekha e meng e kenelletseng ‘musong ke e latelang: Basotho Action Party (BAP), Lesotho Congress for Democracy (LCD), HOPE le Lesotho People’s Congress (LPC).
Ha maemo a le tjena, ‘muso o ikelelitse ho atalosa lekhotla la matona ‘me maobane ho bile le tlhaphantšo ea matona a macha a mahlano matlong a botlotlehi. Tlhaphantšo eo e nyollela palo ea matona ho tloha ho 15 ho ea ho 20. Tebello ke hore hot la boela ho hlapantšoe batlatsi ba matona hamorao.
Mokhethoa oa RFP ho tsoa lebatooeng la Mokhotlong, Letsema Adontsi, o hlapantšitsoe e le letona la Meru le Tikoloho. Mputi Stephen Mputi eena ke mokhethoa oa Maputsoe mokheng oa RFP ‘me o ile a hlapantšoa e le letona la Bosebeletsi ba Sechaba.
Motlatsi oa moeta-pele oa LCD, Tšeliso Mokhosi ebile e le moparamente oa khekhethane o hlapantšitsoe e le letona la Khiro le Bosebetsi.
Ho boetse ho hlapantšitsoe moeta-pele oa BAP Prof. Nqosa Mahao e le letona la Matla. Motlatsi Maqelepo le eena ho hlaha BAP o hlapantšitsoe e le letona la Bohahlaoli, Lipapali, Bonono le Bochaba.
Ts’eliso Mokhosi o hlapants’itsoe e le letona la Khiro le Bosebetsi
“Tlhapantšo ea batlatsi ba matona ha e ea tsoelapele maobane joalokaha ho ne ho reriloe empa e se e tla ba ka letsatsi le tla behoa” Ho boletse monghali Thabo Moleko ofising ea mongoli oa ‘muso.
Ho sa le joalo, Letona Mokhosi o ile a ba le puisano le baqolotsi ba litaba kamor’a ho nka kano ea botona. O supile hore taba e ka holimo eo a tlo sebetsana le eona ha a kena ofising ke ho bona hore o loanela botsitso lipakeng tsa basebetsi le bahiri.
“Taba e ntlisitseng lipolotiking ke lerato la ho tla sebeletsa naha ea heso ’me honajoale re maemong ao motho o ka reng maemo a litaba tsa moruo, le botsitso li’a re sokolisa.”Ho rialo Mokhosi.
Mputi Steven Mputi letona la Bosebeletsi ba Sechaba
“Botsitso ke tšiea e kholo hobane ha bo le teng litaba tsa moruo li tla sebetseha habobebe hobane bo-ramatsete ba tla tseba ho tla habobebe. Basotho le bona kahara naha ba tla tseba hore ba sireletsehile.”
Ka lehlakoreng le leng, mohlomphehi Mputi o supile hore ke boikemisetso ba hae ho bona hore bosebeletsi bo atlehela Basotho. A re bo lokela ho matlafalla sechaba hobane baji ba bosebeletsi ke sechaba ‘me ha sechaba se khotsofetse le bosebeletsi bo tla thaba.
“Ha bosebeletsi bo sa thabisi, ho ba thata hore litšebeletso tseo bo fanang ka tsona ho baji e-be bo khotsofatsang. ”Ho rialo Mputi.
Mputi Steven Mputi letona la Bosebeletsi ba Sechaba
Mohlomphehi o boletse a tlo kopana le bohle ho tloha fatše ho ea bookameling e le ho fumana tsela ea tšebetso le ho kopana le oa mphato oa hae ea tsoang ofising ho mo fa moo aneng a ralile ka teng.
“Hantle naha e phelang hantle eo moruo oa eona o batlang o tsitsitse, ke takatso ea ‘muso hore likhoebo tse ikemetseng (private sector) e-be tsona tse hirang.” O fera joalo.
