LETOFE LE FETOLA MAOA
Ka Matlhohonolofatso Lebesa
La 8 Pulungoana 2023
Bahlophisi ba konsarete e kholo ea ’mino, Lesotho Tourism Festival (LETOFE) hammoho le batšehetsi ba eona, ba bile le ’moka oa bo-ralitaba maobane ho khakola mokete oa monongoaha semolao hoteleng ea Lancer’s Inn, Maseru.
Mokete o tla tšoareloa Thaba-Bosiu Cultural Village ka la 23 Tšitoe 2023. Motšehetsi e moholo oa LETOFE ke Standard Lesotho Bank hammoho le bo-mphato’a bona ho hlaha Alliance Insurance Group.
Mookameli oa Standard Lesotho Bank Anton Nicolaisen o ile a khotha seotlo a re sepheo sa ’moka ke ho thakhola konsarete semolao.
Anton Nicolaisen, Mookameli oa Lesotho Standard Bank
“Ona ke mokete oa leshome le metso e robong esale LETOFE le thehiloe. Re le banka haesale re tšehetsa mokete ona o ratoang ke Basotho le baeti ba hlahang linaheng tse ling tsa boahelani ’me taba ena e re thusa kholong ea bohahlaoli.” Nicolaisen o rialo.
O bile a phatlalatsa hore basebelisi ba banka ea habo ba tla theoleloa thekong ea litekete ha ba reka ka likarete tsa banka ka linoko tse tšeletseng (6%).
Budaza Mapefane o ne a bina konsareteng ea LETOFE 2021
“Ke etsa khoelehetso ho Basotho ho tsoela-pele ho tšehetsa mokete ona hammoho le ho amohela liphetoho tse ncha popong ea mokete. Ka mokete ona re leka ho leboha Basotho ba re tšehelitseng le ho khutlisetsa sechabeng. Re boetse re tšehetsa mekete e meholo ea ’mino linaheng tse fapaneng hloahloeng ea Afrika.” O li beha joalo Nicolaisen.
Ho sa le joalo, lebitsong la batšehetsi ba bang, mookameli Lefapheng la Lithekiso le Likamano tsa Sechaba ho tsoa Alliance Insurance Group, Rethabile Mabaleha o supile hore ba lebohile haholo hore ba ile ba kopanya matsoho ho nyolla mokete ona.
Kwesta o bina konsareteng ea LETOFE 2022
A re o na le tumelo e tiileng hore mohlophisi oa mokete, monghali Montoeli ‘Moleli o ne a na le toro hore LETOFE lilemong tse leshome e tla be e le hokae.
“Rona re le batšehetsi ha se taba ea hore na re fumanang empa e ka holimo-limo ke hore na mokete o tla tsoela Basotho molemo ofeng le hore na mesebetsi e tla hlaha na?” Ho rialo Mabaleha.
A tsoela-pele ho supa hore ba ile ba elelloa toro ea mohlophisi ea hore matsoa-ntle a kene kahare ho naha ea Lesotho moo ho bang le seo ba se sieang e le hore Basotho ba be le seo ba se isang ka mpeng le hona ho nyolla moruo oa naha.
Rethabile Mabaleha – mookameli Lefapheng la Lithekiso le Likamano tsa Sechaba ho tsoa Alliance Insurance Group
A re bohahlauli ke e ’ngoe ea litšiea tsa kholiso ea moruo oa naha ea Lesotho.
Mabaleha o lihelletse likhala ka hore selekane sena ke e meng ea methati ea bona ea ho kopana le bo-mphato’a bona e le ho thakelana ka malebela a khoebo le ho tiisa selekane sa bona.
Ka le hlakoreng le leng mohlophisi oa LETOFE, Monghali ‘Moleli o hlalositse hore selemong sena ba fetola maoa. O re ba lekile ho fa mefuta eohle ea libini monyetla oa ho ba le seabo e le ho tlosa tloaelo ea hore mokete ona ke oa batho ba baholo feela. O itse ba bulela thaka e ncha monyetla oa ho tla nyakalatsa batho moketeng ona.
Casper Nyofest o thabisa lets’oele moketeng oa LETOFE 2021
‘Moleli o hlokomelisitse sechaba hore LETOFE le ntse le fetoha kaha ha e sa le mokete oa Jazz feela. “Re lekile ho bopa lethathamo la libini ka mefuta e latelang ea ‘mino: Afro Pop, Jazz, Hip-Hop, Soul, ba binang ho jaefisa batho joaloka ntate Stunna, Famo hammoho le li-DJ.” ‘Moleli oa hlalosa.
Kwesta o bina konsareteng ea LETOFE 2022
Montoeli ‘Moleli – Mohlophisi oa LETOFE
“Re kenyellelitse li-DJ e le ho matlafatsa bacha hoba boholo ba bona ke li-DJ.” ’Moleli o kobella litaba tsa hae joalo.
Hara lethathamo la libini le tla nyekalatsa barati ba ‘mino ke Jimmy Dludlu, Mi Casa, Munique Bincham, Mafikizolo, Casper Nyofest, Press, DJ Zinhle, De Mthuda, Dako Saiko, Stimela, Ntate Stunna, Sefako sa Menoaneng, Mookho, Y4 Band, DJ Tseko, Afro DJ, Goldhearted, Mekonko, Da Starr, DJ Lym, DJ Mosh, Tshepza DJ, Lady Dee, Tedoz DJ le X – Morizo.
Mothehi oa Sehlopha sa ‘mino oa Famo, Sefako sa Menoaneng, Lebohang Lets’ohla o ile a fuoa monyetla oa ho bua ‘me a leboha bahlomphisi le bats’ehetsi hore sehlopha sa habo se fuoe monyetla oa ho tla tsanyaola konsareteng ena lekhetlo la pele.
