WORLD VISION E THOPHOTHETSA THUTO KA TLHEKEFETSO
Ka Matlhohonolofatso Lebesa
La 11 Tšitoe 2023
Mokhatlo oa World Vision Lesotho o khakotse matsatsi a leshome le metso e tšeletseng a toantšo khahlanong le tlhekefetso ea bana le basali, Matlameng, Leribe bekeng e fetileng.
Mookameli oa meralo tikolohong ea Hlotse, Monghali Solomon Motjelaba ha a bua le sechaba sa Matlameng, o itse tšebelisano le kopano ke tsona tse ka thusang ho nena le ho loantša tlhekefetso.
A re litaba tsa tlhekefetso li bokanetsoe ke bohle ho kenyeletsa mekhatlo ea machaba.
“Matsatsi ana a leshome le metso e tšeletseng, ke matsatsi ao re kopanang ho etsa lerata ho bohle ho nena tlhekefetso. Ke boikarabello ba rona kaofela ho ema ka maoto ho nena tlhekefetso ka botlalo. Re le World Vision Leribe ha re mokhelo ho bona hore bohle ba ba leseling.” Ho rialo Motjelaba.
Solomon Motjelaba, Mookameli oa meralo tikolohong ea Hlotse
A re bahlekefetsi le bahlekefetsuoa ba bang ha ba leseling hore tlhekefetso e ntse e etsahala le hore na litla-morao tsa eona ke lifeng. O boetse a supa hore ba eme ka maoto ho bona hore bohle ba tseba hore ho lekane ka tlhekefetso.
“Mohoo oa selemo sena ke o reng ha re tseteleng ka hohle ka moo re ka khonang ho bona hore mekhoa eohle e ka bang teng ho sebelisoa ho thibela tlhekefetso e ea sebelisoa.” Ho hlalosa Motjelaba.
O ile a hatella hore ho tlameha ho tiisoe likotlo ka makhotleng hore bahlekefetsi ba khoe mekhoeng. A re bana ke moruo le baetapele ba kamoso ‘me a hlokomelisa batsoali hore tlhekefetso e etsoang mahareng a batsoali ka malapeng e ama bana.
“Lintho tsohle tseo re li etsanang ka malapeng ke peo eo re e jalang. Haeba re ntse re jala peo ea lintoa le lipolaeano tse tlisang litlhekefetso tse sa eeng moriting re tlo ba le sechaba sa bahlekefetsi.” Motjelaba o rialo.
A re malapa a phelang ka tlhekefetso ha a atlehe ebile a khina kholo ea moruo oa naha hoba motho ea hlekefetsoang o lahleheloa ke boitšepo ebile o sitoa ho nka karolo moo a phelang teng.
“Toro ea rona ke ho bona tlhekefetso kahara Lesotho e-ba pale ea maobane. Re na le toro ea ho bona sechaba se phela ka khotso ho se na litaba tsa tlhekefetso, ’me rea tseba hore sechaba se joalo e tlo ba se phelang ka khotso le ho ntlafala litabeng tsa sona tsa moruo le ho ntlafala moeeng.
Bana ba bile teng ka bongata ho imamella thuto ka khoebisano ka batho
A eletsa batsoali hore ba batle thuso ha ba na le khalefo ’me ba leke mekhoa e meng ea ho ntša bohale ka ho qoba ho bo ntšetsa baneng kaha ba lokela ho ba holisetsa tšabong le leratong la Molimo.
A tsoela-pele ho bontša hore ka tšebelisano le balekane ba bona, ho se ho na le mehato eo ba seng ba e nkile ho bona hore ba fetisa thuto sechabeng, ’me a re seo ke sona se tla ba thusa hofihlela tlholo.
Sechaba se ileng sa khobokana Matlameng ho tla mamela thuto ea World Vision ka khoebisano ka batho
Motjeleba o ile a ipiletsa ho sechaba ho tlaleha tsohle tse amanang le tlhekefetso ka ho fana ka menyenyetsi hore bahlekefetsi bohle ba fuoe kotlo e ba lokelang hore ba tlohelle liketso tsa tlhekefetso.
Ho sale joalo, monghali Lebamang Rasetla ho hlaha Lefapheng la Toantšo ea Khoebisano ka Batho, World Vision o supile hore tšebetso ea bona ea mantlha ke ho sireletsa litokelo tsa mantlha tsa batho ba nang le bokooa. A re ba boetse ba shebane le ho hlokomelisa batho ka tlolo ea molao ea khoebisano ka batho.
A tsebisa sechaba hore naha ea Lesotho e hlaha maemong a bobeli lefatšeng litabeng tsa khoebisano ka batho.
“Re behiloe mokhahlelong oa bobeli lefatšeng ho latela hore na ke mekhoa kapa maoala afeng ao re a sebelisang re le naha ho arabela litaba tsena tsa khoebisano ka batho.” Ho rialo Rasetla.
A tsoela-pele ho supa hore boithutong ba bona ba fumane hore mahlatsipa a thekiso ea batho a tšepisoa mesebetsi kapa likolo ka marang-rang.
“Hangata re khothaletsa Basotho hore ha ba fumane mosebetsi kapa likolo ka marang-rang ba netefatse hore efeela e le oa ’nete o molaong ka ho fana le ho tsebisa ba pela bona hore na ba ea hokae.” Rasetla oa hlalosa.
Lebamang Rasetla, Lefapha la Toantšo ea Khoebisano ka Batho, World Vision Lesotho
A re sena se boetse se tlisa tlhekefetso ho bana kaha joale ba sala ba le bang moo bahlekefetsi ba nkang monyetla oa ho ba hirisa kapa ho ba nyalisa kapa ho ba tšepisa lintho li hana ho fela e le ho fumana tsela ea ho phela.
“Ho hlokomelehile hore ho na le bo-’m’e le bo-ntate ba bonang ho le molemo ho nyalisa bana ba banana ba tlaase lilemong ka lebaka la bofuma. Re na le litumelo tse fapaneng moo tse ling tsa likereke li nkang bana ho ruisa kereke le hoja ba ne ba tšepisitsoe likolo le mesebetsi.
“Ha litaba tsena li ntse li etsahala re ntse re khothaletsa Basotho ho li tlaleha Lekaleng la Ntšetso-Pele ea Sechaba, Sepoleseng kapa mafapheng a mang a nang le kobo ea bohali litabeng tsa tlhekefetso e le hore baetsi ba liketso tsena ba fumanoe.” Rasetla o lihella likhala joalo.
