LITICHERE TSA NEW MILLENNUM LI OELOA KE TORA
Ka Moipone Makhemeng
La 7 Tlhakubele 2024
Litichere tse ’maloa tsa Sekolo sa New Millennium High School, Lower Thamae, Maseru li felletsoe ke mosebetsi kamora ho fumana mangolo ho tsoa bookameling ba sekolo ka la 5 Tlhakubele 2024. Menyenyetsi e supa e ka ba matichere a ka bang mararo.
Ho ea ka bookameli, matichere ao a fokotsoa ka lebaka la mathata a lichelete a tobileng sekolo. Mookameli oa sekolo, mofumahali ‘Masenate Molapo, mangolong ao a a ngolletsoeng ba felletsoeng ke mosebetsi o ngotse joana:
“Joalokaha u tseba hore sekolo se bile le mathata palo e qephileng ea barutoana ba ngolisitseng, sena se thefutse lekeno la lichelete haholo. E le ho rarolla mathata ana le ho netefatsa botsitso ba sekolo, ho ile hoa tlameha ho etsoa liqeto tse boima, ho kenyelletsoa le ho kenya tšebetsong phokotso ea basebetsi.
“Kamora ho shebisisa ka hloko, sekolo se sebelisitse mokhoa oa ho khetha basebetsi ba tla fokotsoa o bitsoang Last in First Out. Ka bomali-mabe, ho ipapisitsoe le ntlha ena, u emong ea khethiloeng ho fokotsoa.” Lengolo le baleha joalo le koranta e le boneng ka mahlo.
“Re u tiisetsa hore ho fokotsoa hoa hau ha ho amane le hore o ne o sebetsa joang kapa boitelo ba hau mosebetsing. Re ananela seabo sa hau kholisong ea sekolo sena.
“E le karolo ea phokotso ea hau mosebetsing, u tla fuoa monyetla oa ho sebetsa khoeli e le ‘ngoe pele o lokolloa, hape o tla fuoa lichelete tsa hau tsa ho sebetsa nako e telele (severence pay).
Ho sa le joalo, Leihlo la Basotho le etetse sekolong sena maobane, ‘me mosuoe-hlooho, ‘Masenate Molapo o netefalitse hore ke ‘nete ho na le litichere tse fokolitsoeng tlasa mabaka a boletsoeng lengolong. A bontša hore hajoale ha a boemong ba ho araba litaba tsena ka botlalo kaha a lokela ho fumana tumello ho monga sekolo.
Leha ho le joalo, o supile hore methati e nepahetseng e latetsoe e leng ho ba le lipuisano le liakhente tsa sekolo esita le ho nkela litichere tlhabollong ka makhetlo a mabeli.
Qeto ea bookameli ho fokotsa matichere ha e ea thabisa batsoali ba bang kaha ba bolela ha ba lefa lichelete tse boima ho sekolo ‘me ba makala hore na sekolo se lla ka chelete hobaneng.
Ho feta mona, litichere tse fokolitsoeng lengolo le hlalositse li tla lefuoa khoeli ea bona ea tsebiso ‘me tebello e le hore thepa eohle ea sekolo e matsohong a tsona e khutlele sekolong ka la 6 Tlhakubele 2024.
