TLALEHO E TŠOSANG NTOENG EA MOZAMBIQUE
La 8 Phupu 2023
Kamora likhoeli tse ‘maloa ho tloha Pherekhong, 2023 ho bonahetse ho rena khotso ea mabele porofinsing e hometsoeng ke marabele ea Cabo Delgado, Mozambique empa beke e fetileng e bile bolutu bo tšabehang likampong tsa masole.
Setsi se lisitseng maemo a ntoa Mozambique, Cabo Ligado se tlaleha marabele a ile a likanyetsa masole a Mozambique ‘me a fenetha masole a leshome. Ketsahalo e bile metseng e ‘meli seterekeng sa Mocímboa da Praia le Cobre seterekeng sa Macomia ka bo-la 30 Phuptjane 2023.
Masole a shoeleng lintoeng tsena a tlalehoa e le a Mozambique le Rwanda leha sebuelli sa sesole sa Rwanda Mozambique, Brigadier General Ronald Rwivanga a latola bosehla hore masole a Rwanda a amehile lipolaong tseo. Brigadier Rwivanga o re litaba tseo ke mafosisa le mashano a marabele ha a imeloa ke ntoa.
Brigadier General Ronald Rwivanga, sebuelli sa Sesole sa Rwanda, Mozambique
Ho paka hore ke ‘nete marabele a fenethile masole a leshome a ile a maneha litopo tse leshome tsa masole le likarete tsa boitsebiso tse 11 tsa masole. A boetse a maneha foto ea lesole leo a le hapileng.
Boholo ba likarete li bontša bafu e le masole a Mozambique. Marabele a boetse a phatlalatsa moqeqeko oa libetsa tseo a reng a li hapile liketsahalong tseo. Tsona li kenyeletsa eight medium machine guns, five rocket launchers, three mortars, light rifles, boxes of ammunition, hammoho le junifomo ea masole le thepa e ‘ngoe.
Moqeqeko oa libetsa le thepa ea sesole e hapiloeng ke marabele
Koranta ea marabele e bitsoang Amaq e re masole a mang ho a bolailoeng ke a ileng a lahlehela a habo ‘ona ka morung nakong eo marabele a neng a nesetsa masole sefako sa likulo.
Ho sa le joalo, shoalaneng ea la 28 Phuptjane 2023, marabele a ile a hlasela motseng oa Mbau, Mocímboa da Praia. Mona a ile a chesa matlo a boela a bolaea monna motseng oa Limala. Polao ea motho enoa e latela hore baahi ba senye sentele sa moo marabele a neng a ipata teng. Baeka kamora ho fumana sentele se harasantsoe ke moo ba ileng ba iphetetsa ka ho bolaea monna eo.
Se seng sa litopo tse leshome tsa masole a Mozambique (Amaq News Agency]
Matsatsi a mararo kamora ketsahalo e kaholimo, marabele a boetse a bituoa motseng oa Kalugo a thunya mosali nakong eo a ntseng a kena ntlo le ntlo a ikhapela lithepa tsa batho – haholo lijo.
Balebelli ba ntoa ba hlalosa hore ho tloha Pherekhong, 2023, marabele a ile a emisa litlhaselo, a bile a bonoa a phela le sechaba ka khotso; a reka lijo le thepa e ’ngoe ho bahoebi mabopong a leoatle literekeng tsa Macomia le Mocímboa da Praia.
Babali ba tla hopola hore masole a Mozambique a ile a khaohana le ho lelekisa marabele ao ka le reng ha ho hlokahale ho a loantša kaha a ne a phela ka khotso le sechaba.
Lesole la Mozambique le hapiloeng ke marabele (Amaq News Agency]
Se makalitseng bahlopholli ba litaba ke hore nakong ea ho phelisana ka khotso le sechaba palo ea marabele e ne ntse e nyoloha kaha hajoale ho tlalehoa ho na le marabele a ka bang 400 sebakeng seo.
Baetapele ba marabele a Mozambique, ba hatile setopo sa lesole ka maoto [Image Supplied]
