MOKHOSHELI O HAPA M7.2 MILONE EA ECONET

MOKHOSHELI O HAPA M7.2 MILONE EA ECONET

La 8 Phupu 2023

K’hamphani ea mehala, Econet Telecom Lesotho (ETL) e etsoe ka liphalana ke mokhosheli ea butseng polokelo  First National Bank lekaleng le Mafeteng. Tsotsi e atlehile ho hapa M7,298,071.34 ka masene a phokojoe.

Chelete ena ke eo ETL e neng e nahana hore e e lefa polokelong ea Lesotho Electricity Company (LEC), athe ho na le seropo sa mokhosheli.  Bokhotho-khotho bona ke boo Econet e neng e lefa LEC chelete ea motlakase o rekiloeng ke sechaba ka sehlahisoa sa Ecocash khoeling ea ’Mesa 2023.

Ho ea ka Lesotho Times, nomoro ea polokelo ea mokhosheli ke 62770427138 e butsoeng FNB, Mafeteng. Bomenemene bo tlalehiloe Setsing sa Toantšo ea Bobolu le Bomenemene (Directorate on Corruption and Economic Offences – DCEO) ke bookameli ba Econet ka Motšeanong 2023.

Raliphatlalatso oa DCEO, ’Matlhokomelo Senoko o tiisitse hore setsi sa habo se ntse se fuputsa bomenemene bona. Ho sa le joalo, bokhosheli bo bakile likamano tse bosula lipakeng tsa LEC le Econet. LEC e lekile ho khaola maqhama a tšebetso le Econet ka le reng Econet e hlotsoe ho lefa sekoloto sa motlakase oa Ecocash sa khoeli ea ’Mesa ha chelete e tla ea polokelong ea tsotsi.

Haeba maqhama a ka khaoha, sena se tlil’o ama basebelisi ba Econet kaha ba tlil’o sitoa ho reka motlakase ka Ecocash. Leha ho le joalo, Econet e mathetse Lekhotleng le Phahameng ka la 26 Phuptjane 2023 e kopa lekhotla ho thibela LEC ho khaola konteraka kaha taba e tsekoang e tlas’a lipatlisiso.

Lekhotla le fane ka taelo ea nakoana ho laela LEC ho se khaole tumellano ea tšebetso. Nakong ena Basotho ba tla tsoela-pele ho reka motlakase ka Ecocash hofihlela lekhotla le fane ka qeto ea moshoelella ka se tla etsahala.

HO ETSAHETSENG HA CHELETE E TLA EA HO TSOTSI?

Mookameli oa mehleng oa LEC, Mohato Seleke lipampiring tsa lekhotla o hlalosa hore LEC e ile ea fumana lengolo ka imeile le neng le re LEC e fetotse polokelo ea banka. Ho ea ka ‘lengolo’ leo la bokunyata mongoli ea neng a ikhakantse eka o sebetsa LEC o ne a tsebisa Econet hore LEC e fetotse polokelo ea Banka ho tloha ho Standard Lesotho Bank ho ea ho FNB.

Ke moo Econet e ileng ea sebelisa polokelo e ncha e fanoeng lengolong la tsotsi ea hohlometsa M7.2 ’milone ho leqitolo le sa tsejoeng!

EA MOLATO KE MANG?

Ho ea ka lipampiri tsa lekhotla nyeoeng e ritetsoeng ke Econet ho tseka hore konteraka e se khaoloe, mookameli oa Econet, Dennis Plaatjies o re ha se toka hore LEC e khaole maqhama feela ho sa tsejoe hore na bomenemeneng bo etsahetseng ea molato ke mang.

Khang ea Plaatjies ke hore lipehelo tsa konteraka li supa hore ha ho ba le qaka lipakeng tsa mahlakore a mabeli ho tla thehoa lekhotla la bonamoli ho sebetsana le likhang tse ka hlahang.

Plaatjies o re ba makalletse LEC ha e khaola maqhama ho sa ba le monamoli ea kenang lipakeng. Mookameli o boetse o na le khang hore Econet e tlalehile bokhosheli bona DCEO ’me ba lebeletse hore LEC e emele lipatlisiso tsa DCEO pele e ka phaka ea khaola maqhama.

Ho sa le joalo, lebitsong la LEC monghali Seleke o supa hore Econet e bile bohlasoa ka ho tšepa lengolo la lefoofo le ho hloloa ho netefatsa hore e tšela chelete polokelong e nepahetseng ea LEC. O re Econet e ne e tlameha hore ebe e lemohile hore letšoao (logo) la FNB lengolong la tsotsi ke la khale kaha FNB e ile ea phatlalatsa maselinyaneng hore e fetotse letšoao.

“Lengolo leno la lefofo ha le ea romeloa ka imeile ea rona (domain). Ho feta mona, polokelo e fanoeng ea FNB e butsoe Mafeteng. Ntlo-kholo ea LEC e Maseru ’me ha ho ka moo e ka bang le polokelo ea banka Mafeteng.

“LEC e rometse lengolo la mokoloto (invoice) oa ’Mesa le ileng la romelloa ka imeile ea Mohlanka oa Lichelete oa rona, ’Makarabelo Mosuoane a e romella oa mphato oa hae Econet, Tankiso Pholosi ka la 2 Motšeanong 2023 a kopa tefo ea motlakase oa khoeli ea ’Mesa.” Seleke o rialo lipampiring tsa Lekhotla.

Hang letsatsi le hlahlamang, imeile e bontšitseng e tsoa ho Mosuoane ka aterese e tšoanang e ile ea romelloa Pholosi e hlalosa hore polokelo ea banka e fetotsoe. Leha ho le joalo, Seleke o re imeile eno e ne e sa romeloa ho hlaha molikong oa li-imeile tsa LEC (domain).

Mohlanka e mong oa LEC ofising ea lichelete, Mokheseng Mofolo o ile a etsa tšalo-morao ho mohlanka oa Econet, Lerato Moletsane a botsa hore na tefo e se e rometsoe kapa che. Ke moo Moletsane a ileng a romela bopaki hore chelete e lefiloe polokelong ea FNB e boletsoeng.

LEC e tsitlalla hore eona ha e na polokelo FNB kaha e sebelisa Standard Lesotho Bank. Ho boetse ho na le pelaelo ea hore bakhosheli ba kena-kenane le marang-rang a Econet le LEC ho phethahatsa bomenemene bona.  Nyeoe e tla tsoela-pele ka Mantaha ’me e mametsoe ke moahloli Moneuoa Kopo. ’Muelli oa Econet ke Adv. Motiea Teele athe Adv. Tekane Maqakachane o buella LEC.

– Lesotho Times