SEMATLANE O FENETHA MOTHO, O MO LAHLELA NTLOANENG
Ka Moipone Makhemeng
La 18 Motšeanong 2023
Lepota Sematlane (28) oa ha Morena Khoabane Theko, Thaba Bosiu, Masekoeng, o hlahile lekhotleng la ‘maseterata Maseru ka la 15 Motšeanong 2023, a tjametsoe ke qoso tse peli, e leng ea peto le ho fenetha motho a ba a lahlela setopo sa hae ka ntloaneng.
Lengolo la qoso le bontša qoso ea pele e tjametseng moqosuoa e le ea peto ka hore ka la 4 ‘Mesa 2023 o ile a kenya setho sa hae sa botona ka hara botšehali ba e mong Refiloe Makhemeng ntle ho tumello ea hae ‘me sena ke ketso ea tlolo ea molao ea thobalano.
Qoso ea bobeli e supa ha ka la 14 ‘Mesa 2023 motseng o seng o boletsoe, moqosuoa a ile a khama e mong Thapelo Makhemeng ‘me a baka lefu la hae.
Ho hlahella ha Lepota a ne a fasitse Refiloe a mo koalletse ka tlung, ha a tla mo beta. E le ho leka ho ipholosa, Refiloe o tlalehoa a ile a etsa leqheka la hore Sematlane a mo lokolle o tla mo lefa M1000 empa a mo thetsa. Ke moo a qetelletseng a hlasetse moena oa Refiloe, Thapelo Makhemeng, a mo fenetha ka ho mo khama a ba a lahlela setopo sa hae ka ntloaneng.
Nyeoe e chochisoa ke mochochisi Hlojeng ha ‘maseterata e le mohlomphehi Peter Molapo athe ‘’matli oa nyeoe ke Police Constable Makhakhe.
Moqosuoa o ile a balloa litokelo tsa hae a ba a hlalosetsoa hore o na le tokelo ea ho ipatlella ’muelli ea ratoang ke eena ‘me eena a ka mo kopela beile Lekhotleng le Phahameng. Hajoale moqosuoa o tla tsoa a le polokelong ea batšoaruoa.
