‘MUSO O NA LE LIPALO TSA HO BUSA – SHELILE
Ka ‘Matlhohonolofatso Lebesa
La 17 Mphalane 2023
Phala ea mokha oa Revolution for Prosperity (RFP), Mokhethi Shelile o tiiselitse balateli ba mokha oa habo le sechaba hore ‘muso o etelletsoeng pele ke RFP o ntse o na le lipalo tsa ho busa.
“Re se re tla emela makhotla a etse tšebetso re khutle re lo ipala ‘me re tla khutla re ntse re le ‘muso.” Shelile o rialo a bua le baphatlalatsi mapatlelong a paramente maobane. O tsoetse-pele ho supa hore ha ho seo bohanyetsi bo ka se etsang se ka hlolang ‘muso. Ho hlokahalang ke hore ka paramenteng ho bonahale hore na ke mang ea reng e! kapa che! ” Shelile o rialo.
Mokhethi Shelile, raliphatlalatso oa RFP [Image ‘Matlhohonolofatso Lebesa]
Tabeng ea maparamente a mang a ’muso a bonahalang a le lehlakoreng la bohanyetsi na le ‘ona a tla tobana le likhato tsa likhalemo tse ka tsoalang teleko ea tsona.
Shelile o arabile taba ena ka hore e tla sebetsoa ke ofisi ea mongoli e mohlolo oa RFP. Leha ho le joalo, o re o na le tumelo ea hore bao ba tla bitsoa ho tla lokisa litaba se-lehae e le ho sheba hore na seo ba se etsang se tla ba molemong oa bona kapa oa RFP.
Mohlomphehi a re ba tsoa sebokeng se seholo se entseng qeto ea hore komiti e teng e lule ho feta lilemo tse hlano ‘me seo ba se laba-labelang ke hore RFP e-be le botsitso e le ho fa puso botsitso.
Shelile o buile litaba tsena kamora hore Motsamaisi oa Lipuisano Ntlong ea Bakhethoa, Tlohang Sekhamane a fanyehe ha nakoana tšisinyo ea ho hloka tšepo ho tonakholo e ileng ea hlahleloa ke moetapele oa Basotho National Party, Machesetsa Mofomobe a tlatsitsoe ke oa Democratic Congress DC, Mootsi Lehata.
Motsamaisi oa Ntlo ea Bakhethoa o ile a fanyeha tlhahiso ea ho hloka tšepo ho ‘muso kamor’a hobane moparamente oa RFP, Lejone Puseletso o ritetse nyeoe e qholotsang tšisinyo-tlhoka-tšepo e hlahletsoeng ho ‘muso ka le reng ho emeloe lifiromo pele ho ka ba le tšisinyo e joalo.
Ho sa le joalo, moetapele oa mehleng oa mokha oa Alliance for Democrats, Monyane Moleleki o tempetse hore puso e etelletsoeng pele ke tona-kholo Sam Matekane e tlo sala e le marantha nakong ena eo ho ntseng ho emetsoe nyeoe hore e buuoe ke makhotla.
Ho sa le joalo lehlakore la ‘muso le supa le na le lipalo tse fetang 61 kamora ho ipala maobane.
