MOQOSUOA OA BOSHOLU BA M7 MILONE EA ECONET O FUOA BEILE EA M500 000
Ka Moipone Makhemeng
La 22 Phato 2023
Monna oa Mosotho oa Mafeteng, oa mohlobo oa Mo-India, Walim Ashraf o hlahile lekhotleng la ‘maseterata Maseru kajeno a tobane le qoso ea bosholu ba bokunyata le ho hlatsoa chelete e kaalo ka M7,298,071.34 ea Econet Telecom Lesotho.
Nyeoe e kapela ‘Maseterata Lerato Ntelane le mochochisi Mponeng Ranthithi. ‘Maseterata ha a bala qoso o hlalositse hore ka la 5 Motลกeanong 2023 Maseru libakeng tse sa tsejoeng ho bochochisi, moqosuoa o ile a fana ka leseli la leshano ho Econet Telecom Lesotho a ikhakantse hore eena ke ‘Makarabelo Mosuoane eo e leng mohiruoa oa K’hamphani ea Motlakase (Lesotho Electricity Company – LEC).
Moqosuoa o ile a ngola lengolo la email la bomenemene a le ngolla Tankiso Pholosi eo e leng mohiruoa oa Econet.
Lengolong la email, ka boikhakanyo o ile a bolella Pholosi mafosisa a hore ho kenngoe chelete ea Ecocash e neng e le tlasa Sasai Finacial Services polokelong eo a ileng a e hlalosa e le e ncha.
Adv. Kabelo Letuka, ‘muelli oa Walim Ashraf
Moqosuoa o ile a bua mafosisa a re chelete ea Econet e neng e lokela ho lefella motlakase o rekiloeng ka Ecocash (khoeling ea ‘mesa 2023) e lokela ho romelloa nomorong e ncha ea LEC kaha ea khale ea 9080003225255 e neng e butsoe Lesotho Standard Bank e fotoletsoe ho e ncha e butsoeng FNB Lesotho Mafeteng polokelong ea 627704277138.
O ne a etsa sena hore Pholosi a romelle chelete e boletsoeng polokelong ea hae feela a ne a tseba hantle hore eena ha se ‘Makarabelo Mosuoane, le hore o ne a se na matla a ho fetisa kapa ho amohela lichelete tsa LEC.
Maseterata o tsoetse-pele: “Ho thoe u ne u tseba hore uena ha u ‘Makarabelo Mosuoane ebile ha u mohiruoa oa LEC.
“Ka mantsoe a mang u entse bokunyata ba hore chelete e se ke ea kena polokelong ea Standard Bank e kenngoe ho ea hau u le Walim Ashraf lebitsong la khoebo ea hau ea Beauty Center.
‘Muelli oa moqosuoa ke Adv. Letuka o ile a mo kopela beile a bontลกa hore moqosuoa o na le lelapa. O hlalositse hore bana ba moqosuoa ba bararo le mofumahali oa hae ke Mosotho.
Molati o tekile kapele ho lekhotla hore bana ba moqosuoa le mohatsa oa hae ba phela Afrika Boroa moo bana ba kenang sekolo teng, athe mosali o sebetsa teng.
Leha ho le joalo, o ile a khutla a bontลกa hore ke phoso o buile seo ka thello ea leleme kaha moqosuoa nako eohle o ne a le Afrika Boroa pele a bitsoa. O hlakisa hore bana ba India e seng Afrika Boroa. Sena se tlile kamora hore mochochisi a bontลกe hore ho na le hoo e seng ‘nete mabapi le lelapa la moqosuoa ‘me a kopa khefutso ho netefatsa seo.
Ho sa le joalo, ‘muelli ha a mo kopela beile o entse thapeli ho lekhotla hore moqosuoa a ke ke a baleha, o tla ba teng lekhotleng ha a hlokahala joalokaha a ile a fumaneha ha a tla ba lekhotleng mona.ย A boela a bontลกa hore moqosuoa o na le thepa e leng meaho e ka bang mene ho kenyeletsa moaho oa complex kamora Econet le K’hamphani ea Beauty Center Mafeteng.
‘Maseterata o ile a bontลกa hore ka lebaka la ho bua mafosisa pele a re lelapa la hae le Afrika Boroa empa le le India le hore thepa eo a boletseng a na le eona e mabitsong a hae a le mong lehoja a na le mosali o utloa a hloka botsitso. Leha ho le joalo o ile a mo fa beile ea makholo a mahlano a likete (M500 000) le ho beha paneng thepa eo e seng ea hae ea boleng bo kaholimo ho M1,000,000.00
Moqosuoa o ile a hloleha ho lefa beile le peheletso ka hona o tla tsoa a ntse a le ka polokelong e batลกoaruoa.
