MOAHLOLI HLAELE O BA KHAHLOLA LILEMO TSE 25 LE 5 CHANKANENG
… EMPA BA TLA TORONKA TSE 15 LE TSE 2 FEELA
Ka Moipone Makhemeng
La 23 Phuptjane 2023
Rankakata Moiloa le Matanya Moiloa ba hlahile Lekhotleng le Phahameng, Maseru kajeno ka pele ho moahloli ‘Mabatšoeneng Hlaele ho ea mamela kahlolo kamora hore babuelli ba ba kopele mohau. Baqosuoa ke matsoalloa a Pae-Lea-Itlhatsoa ha Morena Letsie Seeiso, Mokhotlong. Babuelli ba bona ke Adv. Tšoeunyane Mokobori le Adv. Fumane Maieane ha ‘muelli oa Mofapa-hlooho e le Adv. Tsebiso Fuma.
Baqosuoa bana ka la 16 Phuptjane 2023, lekhotla le ile la ba fumana ba le molato oa polao ea bafu ba babeli, Teke Chere Letsapo le Realeboha Letsapo hammoho le ho lematsa e mong Tsotang Qofa ka la 11 Hlakola 2013 Pae-Lea-Itlhatsoa, Mokhotlong.
Nyeoeng ena baqosuoa ba ne ba le bane; e mong o se a timetse athe e mong esale a tšola tlhako-morong. Moahloli Hlaele ha a bala kotlo o ne a ipapisitse le nyeoe ea Tuke e bontšang hore kahlolo e fanoa ho ipapisoa le a mang a mabaka a lateleng; lilemo tsa moqosuoa ka nako eo a neng a etsa tlolo ea molao, hore na o ne a le tlas’a tšusumetso ea tai, boemo ba qoaketsano e bileng teng, bophelo ba moqosuoa, tumelo ea boloi ekasitana le maikemisetso a ho etsa tlolo ea molao har’a tse ling.
Moahloli Hlaele o boetse a bontša hore ‘muelli oa baqosuoa, Adv. Mokobori, ha a ba kopela kotlo e bobebe o hlalositse hore tlolo ena ea molao e etsahetse lipakeng tsa bana ba motho. A otlolla hape hore morero oa ho etsa tlolo ea molao o ne o le sieo sethathong. Ho bala ka botlalo litaba tsa ho ba kopela mohau kena 👉🏿MONA.
Ka lehlakoreng la mofapa-hlooho Adv. Fuma o ile a tsitlalla hore kotlo e se fokotsoe ho moqosuoa oa pele kaha tsela eo a khakhathileng mofu e mong ka eona e ne e se na botho. Mona moqosuoa oa pele o ile a tekela lekhotla hore o ile a hlaba mofu eo ka lerumo leha a se a oele fatše.
Leha ho le joalo, Adv. Fuma o lumellane le hore moqosuoa oa bone eena pebofatso ea kotlo e ka ba teng kaha h’a ba le seabo se se kaalo lipolaong tsena.
Ho sa le joalo, moahloli Hlaele h’a fana ka kotlo o supile hore o fana ka eona a ipapisitse le molao, a bile a ipapisitse le nyeoe ea F vs Zing e hlalosang hore kotlo e lokela ebe e lekanang le tlolo ea molao, hape e khotsofatse sechaba feela e kenyeletse mohau.
Qetellong moahloli Hlaele o ile a lihella moqosuoa oa pele tora – Rankakata; a laela hore o tla toronka lilemo tse mashome a mabeli a metso e mehlano (25). Kahlolong ena, Hlaele o manollotse kotlo ea Rankakata tjena; qosong ea pele ea polao ea Chere o ahloloa lilemo tse 15, qosong ea bobeli ea polao ea Realeboha, o ahloloa lilemo tse 8, qosong ea boraro ea ho lematsa Qofa o ahloloa lilemo tse 2. Moahloli Hlaele o laetse hore kotlo tsena li tsamaee ‘moho kahona Rankakata o tla toronka feela lilemo tse 15.
Ho sa le joalo, moqosuoa oa bone e leng Matanya, o ahlotsoe lilemo tse hlano (5) moo teng moahloli Hlaele a bontšitseng hore lilemo tse peli ho tseo ke tsa qoso ea polao ea Chere, tse ling tse peli ke tsa polao ea Realeboha e leng qosong ea bobeli, ha ea ho qetela e le ea ho lematsa Qofa ‘me ho eona o ahlotsoe selemo. Ka tsela e ts’oanang Moahloli Hlaele o laetse hore kotlo tsena li tsamaee ‘moho, kahona Matanya o tla toronka lilemo tse peli feela.
Bala hantle mapaki a nyeoe ena le se etsahetseng mohla lipolao tsena penya 👉🏿MONA.
