BAITHUTI BA HANA HO NGOLA LITLHAHLOBO
Ka Moipone Makhemeng
La 23 Phuptjane 2023
Baithuti ba Lerotholi Polytechnic, ba bile le kopano mapatlelong a sekolo maobane ho tšetšetha litaba tse ba amang ebile li sa jese litheohelang. Taba-kholo e bile litefello tsa bona tsa sekolofisi tse bonahalang li e-s’o lefshoe ke Lefapha la Lihlapiso tsa Baithuti (National Manpower Development Secretariat – NMDS).
Sena se tla kamora hore Mongolisi oa Sekolo, Mofumahali Maleshoane Lepota-Mosakeng a ntše puo puisanong le koranta ena hore ho fihleoe tumellano hore baithuti ba ngole litlhahlobo tsa bona tsa mapomelo leha ba kolota. O hlalositse hore mafapha ana, Sekolo, Lekala la Thuto ekasitana le la Lichelete a tla sallana le ho rarolla qaka ea mekoloto ea baithuti. Litaba tsa Lepota-Mosakeng tsa pejana li fumaneha MONA.
Ho sa natsehe tumellano e fihletsoeng ke sekolo le mafapha ao, seboko sa baithuti ke hore leha e le mona botsamaisi ba sekolo bo re ba ngole lihlahlobo pele NMDS e ba lefella sekolofisi, ha ho na moo ho banahalang ho thoe ha ba sa na mokoloto. Ka hona, ba na le letsoalo hore hang ha ba qeta ho phethela lihlahlobo, mangolo a bona a tlo tšoaroa ke sekolo ka le reng ba kolota.
Ba boetse ba re ba batla tokomane ea litumellano tse entsoeng ke sekolo le mafapha a boletsoeng e le ho ikholisa hore litaba efeela li le joalo.
Ntlha ea bobeli eo ba leng seboko ka eona ke hore likonteraka tsa bona le NMDS li bontša hantle hore lefapha lena le tla ba fa litsiane tsa tlhokomelo hofihlela ba tsoile ka hare ho jarete ea sekolo. Ba totobatsa hore ha khoeli e fela beng ba matlo ba tlil’o batla chelete ea rente ka hona ba hloka NMDS e ba fe litsiane tsa khoeli eo ba tlo e lula ha ba ntse ba ngola litlhahlobo.
Ho sa le joalo, kamora ho komela lintlha tsena baithuti ba ile ba tekela mopresitente oa Lekhotla la Baithuti (SRC), Paseka Rateronko hore ba ngolle sekolo lengolo le totobatsang hore ha ba na ho ngola lihlahlobo hofihlela litaba tsa bona tsa sekoloto li hlakile hore efeela ba sa kolote. Ba boetse ba bontšitse ba batla tokomane ea tumellano e entsoeng ke sekolo le mafapha a boletsoeng.
Rateronko o ba tiiselitse hore lengolo le joalo ba tla le ngola ba le fetise feela a re ba ipotsa hore na ha botsamaisi ba sekolo bo ka le ananela kapa ba le tjebela matjoing na boemong bo joalo teng ba tle ba reng. Ha ba fetola ba bontšitse hore bona ba se ba tla e nka ho tloha mono.
Taba e ‘ngoe eo ba e totobalitseng ke hore ba hloka ho kena litlhahlobong ba tlatsitse foromo ea tumello e bontšang hore ha ba kolote letho (clearance form) sekolong.
Ho feta mona, kopo ea bona ea ho qetela ho SRC ebile hore e ba fumanele litjeo kapa litšenyehelo tsa tšenyo eo ba e bakileng nakong ea boitseko hore ba tle ba lefe molato o joalo.
Litaba ha li le mothating ona, potso e ileng ea sala e sa arabeleha ke hore na baithuti ba kolota lilemo tse peli joang empa selemo ea 2021/2022 ba ile ba tlatsa clearance form e bontšang ba se na sekoloto ho sekolo ‘me ka lebaka leo ba bang ba ile ba fumana mangolo a ho phethela lithuto.
