MEKHATLO EA MATICHERE E FANYEHA MOKOLOKO
… E KENA LIPUISANONG LE ‘MUSO
Ka moqolotsi oa rona
La 14 Pulungoana 2023
Mekhatlo e meraro ea setlamo ea matichere, Lesotho Association of Teachers (LAT), Lesotho Teachers’ Trade Union (LTTU) le Lesotho Principals’ Association (LESPA) e re e fanyehile mokoloko o neng a lokela ho tsoela-pele hosane moo matichere a neng a il’o nehelana ka lengolo la litletlebo ho tona-kholo.
Sena mekhatlo e re e se etsa hoba ‘muso o lumetse ho kena lipuisanong le eona ho rarolla tse ling tsa lillo tsa ‘ona,
Ho ea ka tumellano e tekennoeng ke mekhatlo le ofisi ea motlatsi oa tona-kholo kajeno, mahlakore a lumellane ka lintlha tse ‘ne tsa mantlha.
Ntlha ea pele; ‘muso o itlamme ho sebetsa lillo tse salletseng morao tumellanong e bileng teng lipakeng tsa mekhatlo ea matichere le ‘muso ka 2019. ‘Muso o boetse o ikanne ho lefa meputso ea matichere ea Loetse 2019. Boitlamo ba ho qetela ke moo ‘muso o itlammeng ho kena lipuisanong le mekhatlo ho seka-seka tseko ea matichere ea tefo e lekanang lipakeng tsa matichere a likolo tsa mathomo le tsa mahareng.
Kamor’a boitlamo ba ‘muso bo ngotsoeng fatše, mekhatlo ea matichere e itlamme ho fanyeha mohoanto o neng o reretsoe ho tsoela-pele hosane.
Ho sa le joalo lillo tse ling tsa matichere tse keneyeletsang mekoloto ea lilemo-lemo (arrears) ea matichere le pharela khirong ea mesuoe-hlooho ha li hlahelle boitlamong ba kajeno ba ‘muso. Mokoloko o fanyehiloeng o ne o lokela ho thakhoha hosane ka 10am ho leba Sefikeng sa Moshoeshoe.
