MAPOLESA A MABELI A TEBETSOE
Ka moqolotsi oa rona
La 24 Mphalane 2023
Bookameli ba sepolesa bo tlalehoa bo lelekile litho tse peli tsa sepolesa; Police Constable Thabang Nthebe le Police Constable Tumelo Shoaepane. Ho ea ka tsebiso ea sepolesa e lokollotsoeng maobane, Nthebe le Shoaepane ba felletsoe ke mosebetsi ho tloha ka la 12 Mphalane 2023.
Tsebiso ea sepolesa ka teleko ea bona e re bobeli bo lelekoa ho ipapisitsoe le temana ea 47 ea molao oa sepolesa oa 1998. Temana ea 47 (e) e re ha ofisiri e kholo e mametseng nyeoe tulong ea khalemo tlas’a temana ea 45 ea molao o tšoanang, e ka fana ka kahlolo ea teleko har’a tse ling.
Ho sa le joalo, mapolesa ana khoeling e fetileng a ile a hlahlela nyeoe Lekhotleng le Phahameng a leka ho thibela teleko e neng e a tobile. Seo se tlile kamora ho tetoa ka mangolo a neng a ba kopa ho hlalosa mabaka ao ba ke keng ba lelekoa mosebetsing oa sepolesa.
Shoaepane le Nthebe lipampiring tsa lekhotla ba re ba ile ba qosoa ka boqhekanyetsi le ho rua sethunya ka thoko ho molao ke bookameli ba Sepolesa pejana ka Phuptjane monongoaha. Sepolesa se ile sa ba nkela tulong ea khalemo ’me se re ba fumanoe ba le molato. Litaba tse amanang le tsena li ka baloa 👉🏼 MONA:
