BNP E HLOMA FOLAKHA KA MOKETE HA MOETAPELE
Ka Moipone Makhemeng
La 16 Hlakola 2024
Mokha oa Sechaba sa Basotho (Basotho National Party -BNP) o tla tšoara mokete oa semetletsa lapeng ha moeta-pele, Machesetsa Mofomobe, Ha Thetsane, Maseru hosane.
Phala ea mokha oa BNP, monghali David Patriot Letela puisanong le Leihlo la Basotho o phatlalalitse boitokisetso ba bona ho amohela baeti, kaha likete-kete tsa balateli li lebelletsoe ho iponahatsa moketeng ona. Letela o hlalositse sepheo sa mantlha sa mokete e le ho ea hloma folakha ea BNP lapeng la moeta-pele e le sesupo sa hore lapeng moo ke lehaeng la Manashenale.
“Ka moetlo oa rona re le ba Mokha oa Sechaba sa Basotho; re lumela ho folakha. Boemong ba linaha hang ha folakha e phahama sebakeng se itseng ke hobane sebaka seo folakha e hlonngoeng ho sona e se e le sebaka sa naha ea moo folakha e hlonngoeng teng.
David Letela, raliphatlalatso oa BNP
“Mohlala; mono ntlong ea boemeli ba Amerika e se e le naha ea Amerika mono moo folakha ea bona e emeng. Ka ho tšoana, ntlong ea boemeli ba China ke naha ea China kahara jarete ea moo folakha e emeng. Le koano National Party ho joalo.”
“Re phahamisa folakha lapeng ha moetapele e mong le e mong oa mokha e le ho bontša hore lelapa la hae e se e lehae la rona la Maneshenale. Ke tla u hopotsa hore moetapele oa Mokha oa sechaba sa Basotho e se e ka ba lilemo tse isang borarong a etelletse mokha ona pele. Manashenale a re a ee mono, a il’o etsa mokete oa semetlahali o supang hore lehae la Manashenale ke leno Ha Thetsane moo moeta-pele oa BNP a ahileng teng Ha Thetsane, Maseru.” Letela o li beha joalo.
Pejana ho puisano ena, ba bang ba mokha ba ile ba bontša thabo ka mokete ona ba bile ba bolela hore mokete ke oa litletle ‘me khomo e oele. David o bontšitse hore joaloka mekete eohle ea lipolotiki ho tla ba le metjeko, lipina le lijo.
Ho li phethela, Letela o hlalositse hore ka hora ea leshome le metso e ‘meli ho ea ho ea bobeli folakha e tla phahama ka mebala ea eona ea mokha ho ea holimo e le sesupo sa hore ba ketekela moetapele oa bona oa mokha.
