MAKOTI FESTIVAL E TLA LESOTHO
Ka Moipone Makhemeng
La 8 Tlhakubele 2024
Makoti Festival, Eswatini [image supplied]
Moemeli oa Makoti Festival ho hlaha Eswatini, Thembinkosi Mthethwa, o hlalositse hore mokete o thehiloe Eswatini, ’me oa qala ho tšoaroa ka 2022. Sepheo sa mantlha sa mokete ke ho pepesa le ho phahamisa bochaba, ho keteka basali (bo-makoti); ba nyetsoeng. Sepheo se seng ke ho etsa letsoso toantšong ea tlhekefetso ea basali. Tsena tsohle li tsamaea le ’mino ho thabisa batho.
Thembinkosi Mthethwa
Mokete o tsebahala hape ka ho pepesa meaparo ea feshene ea mehleng ena le ea khale.
Lesotho ke naha ea bobeli e tla keteka Makoti Festival kamora Eswatini ’me morero ke ho pharalatsa mokete ho ea linaheng tse ling ho ea thula bo-Nigeria.
Koano Lesotho, Makoti Festival e tla tšoaroa ka la 5 Mphalane 2024, athe Eswatini linonyana li tla lula batho ka la 27 ’Mesa 2024.
Ho ea ka motsoaki oa ’mino oa lehae, DJ Counter Force, morero oa Makoti Festival ke hore libini tsa Lesotho li fumane monyetla oa ho hlahella linaheng tse ling ho kenyelletsa Eswatini, Botswana, Mozambique le tse ling. Ka ho tšoana libini tsa linaha tseo li tla etela koano Lesotho.
DJ Counterforce
Counter Force a bontša hape hore lenyalo lena le tlil’o bulela libini tsa Lesotho monyetla oa ho itlhahisa; ekaba ka metjeko linaheng ka ho fapana. O itse tloaelo ke hore libini tsa Lesotho li fella kahare ho naha moo talenta e qetellang e fella feela li sa tsebahale machabeng. A re seo se timetsa boitšepo ba libini.
Ka lehlakoreng le leng, Monghali Manama Letsie lebitsong la mokhatlo oa Mokhoenyana eena ha a thatiselletsa holima litaba tsena o li behile joana; “Hantle morero ke ho kopanya lichaba tsena tsa Afrika, re ithutile hore linaha tsa lichaba tse ling li khona ho kopana li etse lintho ’moho empa rona re salletse morao haholo re le Basotho. E ‘ngoe ea tšabonyana ea Afrika ke hore re hloloa ho kopanela lintho re le Ma-Afrika.” Letsie o rialo.
Manama Letsie
O boetse a toboketsa hape hore litabeng tsa bohahlauli ha se Basotho ba bangata ba kileng ba etela Eswatini, Botswana le Namibia kaha Basotho e le sechaba se sa tsamaeeng ‘me sena se bolela hore ke bona ba tšoereng bohahlauli ba bona.
A beha hape hore ke Makhooa ho hlaha Europe a hahlaulang hona Lesotho mona le ho feta beng ba naha. Ke moo a ileng a khoaolla hore ba kene morerong ona hore ka lefapha la boithabiso motho a utloe a kopane le bana ba bang ba babo ‘me ba tloaele ho chakelana, ba se bitsane meleta.
“Khoelehetso ea rona ke hore nako eo mokete o leng Eswatini re lebelletse ho bona Mosotho e mong le e mong a itlhekehla a ea Eswatini. Nakong eo mokete o leng Mozambique re lebelletse ho bona Masoatsi, Batswana all of us re tsamaeeng re ee Mozambique. Nako eo mokete o leng Lesotho, re fihlelleng Lesotho.” Ena ke khoelehetso ea Letsie.
DJ Tseko
Ho tsoelapele, o hlalositse hore a mang a mabaka a kopano le lebaka leo mokhatlo o bitsoang Makoti ke hobane ho bonahetse ka nako e telele basali ba phelisoa ka ho sotloa. Ka hona ba fihlela qeto ea hore ba behe mahetleng a bona ho keteka basali. Le ho ba thusa ho ba batho ba betere.
Motsoaki oa ‘mino DJ. Tseko e le e mong oa litho tsa Mokhoenyana o tiisitse litaba tsena ka hore taba ea Makoti Festival Lesotho e tla ba ka la la 5 Mphalane monongoaha. A re Eswatini linonyana li tla lula batho ka la 27 ’Mesa 2024 . O hlalositse hore Makoti e na le lilemo tse tharo e le teng Eswatini.
