LITHO TSA BNP LI HANA KAHLOLO
Ka Matlhohonolofatso Lebesa
La 27 Mphalane 2023
Litho tse hlano tsa Mokha oa Sechaba sa Basotho (Basotho National Party – BNP), li behelletsoe ka thoko ho mokha nako ea lilemo tse hlano. Lipehelo tsa kahlolo ea bona ke hore litho tseo li se ikamahanye le tšebetso efe kapa efe ea BNP. Litho tse behelletsoeng ka thoko ke tse latelang: Khotso Phafoli, Lebohang Motaung, Seeiso Bereng, Lebeko Mofalali le Makama Monese.
Leha ho le joalo, banna bana ba ile ba epa ‘moka oa bo-ralitaba ka la 25 Mphalane 2023 holong ea Transformation Resource Centre ho fana ka ntlha-kemo ea bona khahlanong le kahlolo eo ba e fuoeng. Ba buile ka ntsoe-leng hore pehello ka thoko ea bona lilemo tse hlano mokheng ha e molaong ebile ha ba lumellane le eona. Ba ngangabetse joalo ba re bona e ntse e le litho tsa BNP.
Litho tsena li behelletsoe ka thoko ke BNP kamor’a ho fumanoa li le molato oa boitšoaro bo sa amoheleng kahar’a tsamaiso ea mokha.
“Re bile ka pele ho komiti ea khalemo e thetsitseng komiti ea phethahatso hofihlela qeto ea hore re lelekoe kahar’a mokha.” Ho rialo Bereng a hlalosa hore ba hlahile kapel’a komiti ea khalemo empa ba na le khoao ea hore ha ba sebeletsoa hantle kaha komiti ea khalemo e fane ka litaba tse fosahetseng ho komiti ea phethahatso.
Litho li re li hana kahlolo
Bereng o supile bona e bile litho tsa BNP nako e telele. A re ntlha-kholo e bakileng pehello ka thoko ea bona ke hoba feela ba ile ba soaea mohlare moetapele le komiti e kholo. O re ba ne ba lla ka lietsahala tse renang kahara mokha ho tloha mohla seboka se seholo sa khetho ea moeta-pele moo ho ileng hoa thunngoa le ho bolaoa ’Mabuoang Mazenyo ka 2021.
“Re ile ra bontša ho se khotsofalle tsamaiso. Re boetse ra botsa hore na mokha o hatetse pele hakae ho sebetsa litaba tsa setho sa rona se ileng sa thunngoa mohla seboka sa khetho ea moeta-pele; ke ha re tla lelekoa.” Bereng oa hlalosa.
A tsoela-pele hore ba le bahlano joalo, ba tla sebetsa ka thata ho bona hore moetapele o tsoa kahar’a ofisi joalokaha ba ile ba sebetsa ka matla ho bona hore o kena kahara eona.
“Machesetsa ha a na botsebi bo phethahetseng ba tsamaiso, o inahana boeena feela ebile o soma batho.” Bereng o seha moeta-pele oa BNP maqa joalo.
O tsoela-pele hore moetapele oa BNP h’a sa lokela ho etella-pele BNP kaha tsohle tseo a li etsang ha li molemong oa mokha kapa sechaba empa li molemong oa hae e le motho.
“Tšisinyo ea ho hloka tšepo ho tona-kholo e kentsoeng ke moeta-pele ha e molemong oa BNP kapa Basotho. Bona Machesetsa; ha a tlameha ho khetha eena hore e-be tona-kholo, o khetha moeta-pele oa mokha o mong oa lipolotiki e leng Mathibeli Mokhothu oa Democratic Congress. Hobaneng a sa ikhethe ho ba tona-kholo?” Ho makala Bereng.
O boetse a supa hore keta-peleng ea Mofomobe, BNP e ntse e nyotobela kaha eena Machesetsa o khethiloe ke batho ba 315 feela. A re likhethong tse sa tsoa feta tsa puso ea libaka, tšebetso ea BNP e ea soabisa.
Bereng o phethetse ka hore se ba thefulang maikutlo ka ho fetisisa ke hore setša sa BNP (BNP Centre) se bonahala se fetohile lepatlelo moo mekha e meng ea lipolotiki e fetotseng sethala sa ho etsa mesebetsi ea eona. O re BNP Centre ho se ho bonahala methoaela ea litho tsa BNP empa ho phethesela litho tsa mekha e meng.
Ho sa le joalo, phala ea BNP, David Letela o fane ka maikutlo holim’a lillo tsa litho tse hlano tse behelletsoeng ka thoko.
Letela o supile hore BNP e latetse methati eohle ho behella bao ka thoko ho mokha nako ea lilemo tse hlano. O supile hore moeta-pele oa mehleng oa BNP, Thesele ‘Maseribane o kile a fuoa kahlolo ea ho behelloa ka thoko ho mokha eaba o ikobela khahlolo eo.
David Letela, raliphatlalatso oa BNP
“Ebang ba na le bothata ka moeta-pele, ba tseba tsamaiso hore ba tlameha ho etsa joang kapa ba ee makhotleng ebang ba sa khotsofala.” Letela oa hlalosa.
Qosong ea hore BNP e sebetsa le mekha e meng ea bohanyetsi, Letela o itse BNP ha e qale ho sebetsa le makhotla a mang a lipolotiki ‘me e tla sebetsa le oona ho latela lehlakore leo e leng ka ho lona ka paramenteng.
O re hajoale ba sebetsa le bohanyetsi hobane mekha eo e na le pono e tšoanang le bona. “Ha BNP e le ka lehlakoreng la puso, e tla sebetsa le mekha e ka pusong ‘me ka ho tšoana ha e le ka bohanyetsing e tla tšehetsa bohanyetsi.
“Ka paramenteng ho sebetsoa ka lipalo ‘me e tla be e le ho phoqa haeba ho ka thoe moeta-pele oa BNP e-be tona-kholo ka litulo tse peli.” Ho hlalosa Letela.
A re bao ba tlohelle ho araba taba tsa mokha ‘mokeng oa baphatlalatsi empa ba latele methati e nepahetseng ea ho bontša ho se khotsofale e leng ho ea makhotleng.
