LETSOELA O FANA KA THUTO E MATLA NUL
La 7 Tšitoe 2023
Ka moqolotsi oa rona
Molaoli oa sesole sa Lesotho, Lieutenant General Mojalefa Letsoela ebile momemuoa oa bohlokoa National University of Lesotho kajeno. Letsoela o bile moo leha memo ea hae e ile ea sonyetsoa ke mokhatlo oa barutehi oa Academic Forum for Development of Lesotho (AFDeL), ka le reng eena le baokameli ba litsi tse ling tsa tšireletso ba ile ba etsa polelo e mali-mabe ba tšosa ka ho liha ‘muso. Leha ho le joalo, NUL ha e ka mamela khoelehetso ea AFDeL hore e hlakole memo ea Letsoela. Tletlebo ea AFDeL hore memo ea Letsoela e hlakoloe e fumaneha 👉🏼MONA.
Molaoli o bile teng tšebeletsong ena hammoho le Motlotlehi Letsie III, Mobishopo oa Kereke ea Chache, Thabo Mokgopa, matona a ‘muso le baeti ba bang.
Molaoli oa sesole sa Lesotho, Lieutenant General Mojalefa Letsoela [Image Facebook/NUL]
Liteboho Maqalika-Lerotholi, Mongolisi oa NUL [Image NUL]
Mongolisi a re ba thabile hore Mok’hanseliri oa NUL, Motlotlehi Letsie III o tla thakhola tšebeletso ena. A re lithuto tsena li tla itšetleha ka litšiea tsa khaho ea sechaba ho ea ka maano a theho ea sechaba a Morena Moshoeshoe; e leng khotso, lerato, botšepehi, mamellano le tlhompho ea litokelo tsa botho.
Ho sa le joalo, Lieutenant General Letsoela o ile a thakhola puo ea hae ka ho leboha NUL ha e mo memme ho tla fana ka thuto. A tloboka nalane ea hae sesoleng ka hore o qalile ho sebetsa e le molaoli oa sesole ka Pherekhong 2018 e le ha a kene bosoleng ka Tlhakubele 1987. A supa hore o qalile fatše e le lesole a nt’o fihlela boemo ba ho ba mofofisi oa lifofane tsa sesole.
Ha a kena tabeng, Letsoela o itse naha ea Lesotho e qeta lilemo tse 200 e thehiloe ke morena Moshoeshoe isao. A toboketsa hore Moshoeshoe o thehile sechaba hara mathata.
“Naha ena e tsamaile methati ea ntlafalo lilemo tse 199 tlas’a baeta-pele ba ‘maloa leha ho bile le liqholotso tse ngata. Leetong lena la phetoho ho bile le liqholotso baetapeleng ba joalo e le ho bona hore seriti le botšepehi baeta-peleng li lula li ananeloa maemong a puso ea sechaba ka sechaba.
“Nalane ea rona le bochaba li bontša hanyane feela litšiea tsa khaho ea sechaba tsa mothehi oa naha ena. Kahona taba ena e hloka boinahano bo tebileng ha e le mona re lebile keteko ea lilemo tse 200 Lesotho le thehiloe re le naha.” Ke eena a qoqopela ka thuto ea hae.
Ha a kena mohong oa letsatsi la kajeno e leng ‘Botšepehi e le Tšiea ea Bohlokoa boeta-peleng bo hloahloa, Letsoela o itse taba ea litšiea tse nepahetseng tsa boeta-pele e bohlokoa haholo.
“Ke lakatsa ho hlakisa hore ka boiphihlelo ba ka ke le lesole le ka thuteho ea ka, boeta-pele ke ho bolela ha batho ka bomong kapa ka sehlopha ba ba le tšusumetso le ho tataisa ba ba setseng morao ho tlisa liphetoho.” Ke eena a tsoela-pele.
Ba bileng teng ho mamela thuto [Image Facebook/NUL]
“Moeta-pele ea nang le seriti kapa botšepehi ke ea nang le boitšoaro bo botle. Moeta-pele o tlameha e-be mohlala ho bao a ba etelletseng pele hore ba tsebe ho mo etsisa. Sena se ka etsahala ka hore ba tsamaee menyabuketsong ea hae le liketso tse ntle tsa botsamaisi le ho khothatsa ba mo setseng morao hammoho le ho fana ka litaelo ho bona.”
Ha a tatamala, Letsoela a re botšepehi bo thusa ho fetola baeta-pele ba fanang ka tšehetso ho balateli e le hore le bona e-be baeta-pele moo ba leng teng. A thatiselletsa hore botšepehi ke tšiea ea bohlokoa haholo kaha balateli ba shebile ho moeta-pele oa bona. A re ba etsa seo ho tseba le ho lemoha hore ba ea pele joang.
“Boiphihlelo le bona bo bapala karolo e kholo. Mona ke leka hore re ba maemong a fapaneng, leha ‘na ke qetile nako e telele bofofising ka sesoleng, empa kamora hore ke be molaoli ke bile le monyetla oa ho kopana le batho ba mafapha a fapaneng.
“Ke ka hona ke reng Morena Moshoeshoe, mothehi oa sechaba sena ebile e le ntat’a chaba sena, e ne e le mohlabani hape e le molaoli, moeta-pele ebile e le molipolomati.”
Molaoli o ile a teha ka mehlala ea baeta-pele ba khale ba ileng ba atleha joaloka Cyrus the Great, eo e neng e le moetapele oa Pesian Empire. A tsota matla a Cyrus kaha a ile a loana a hlola mabotho a mangata joaloka a Babilona. O boetse a lokolisa matla a Alexndara the Great, Julius Ceasar, Napoleon Bonaparte oa France le Adolf Hitler oa Italy.
Letona la Machabeng, Lejone Mpotjoane le la thuto Prof. Ntoi Rapapa ba mametse thuto ea Molaoli ka hloko [Image Facebook/NUL]
A boela a toboketsa hore botšepehi bo boetse bo supa tsela ho fa motho lerato le boitlhompho. “Nka bolela mona hore moeta-pele ea hlokang botšepehi kapa seriti a ke ke a atleha bokamosong ba hae.
“Ke boikarabelo bo babatsehang hore batho ba maemong a boeta-pele ba qobe ho beha melomong ea batho sebaka sa tšebetso moo ba etelletseng-pele teng ho sa hlokahale ka lebaka la bofokoli ba bona e le baeta-pele. Sena se ka tutla matla a boeta-pele ba bona.
“Sesoleng mona re lumela ho khokahano ea tšebetso moo e mong le e mong a nang le seabo empa tseo li etsoa tlasa litaelo. ‘Me sena se bolela hore banna le basali ba tlasa taolo e le ‘ngoe ea tsamaiso. Moeta-pele ea nang le botšepehi le makhabane o lokela ho hloka boikhabo; a itlhomphe a tsebe ho hlomphuoa, hape e-be mohlala.
“Moeta-pele oa ‘nete ke ea lokelang ho etella-pele maemong ‘ohle; ba ka tlaase ho bolaoli ba lokela ho utloisisa hore molaoli o bolela seo a se bolelang.”
Ha a tebisa kepi, Letsoela o hlahisitse taba ea hore moeta-pele o lokela ho sebetsa ka ho tšoana maemong ‘ohle. A re moetapele o lokela ho ba le makhabane a bohlale le sebete.
“Monna kapa mosali ea nang le makhabane ao ke a boletseng e tla ba moeta-pele oa sebele. Botšepehi le seriti ho baeta-pele ha se botšepehi feela, taba ena e ntse e khutlela tabeng ea hore u rate moahisani oa hau. U tlameha ho tseba ka botebo limelo tsa banna le basali ba tlasa taolo ea hau. Sena u se etse hore u fihlele sepheo le pono ea tšebetso.
“Botšepehi boo ke buileng ka bona ha bo fapane haholo le litšiea tse ling; li tsamaea ‘moho joalokaha u ke ke oa arola metsi le tlhapi. Seriti, botšepehi le matla boeta-peleng li ka angoa ke liphetoho tsa marao tjena ‘me bohlale bo bohlokoa.
Letsoela o ile a qotsa mantsoe a bohlale a morui oa Amerika ntate Warren Buffett moo a reng: “Ha u batla ho hira batho, u sheba limelo tse tharo; botšepehi, sehlahlo le bohlale. Haeba u se na tšiea ea pele ea botšepehi tsena tse peli li tla u bolaea.”
Letsoela o re Buffett o tsitlalla hore sehlahlo le bohlale li bohlokoa empa ha li le sieo ho batho, seo se ka ama hampe sebaka sa tšebetso.
“Bohlale bo tla ka mekhahlelo, motho e mong a ka ba bohlale haholo empa a hloleha ho rarolla mathata le liqholotso tsa bophelo.” Ke eena a teha ka mohlala hore bothata bona bo atile haholo bophelong ba letsatsi le letsatsi.
Ha a menyeletsa maritsa o itse ho bohlokoa ho chorisa bohlale ba rona. A re ha rea lokela ho tlolisa mahlo mekhahlelo e meng ea bohlale kaha e le bohlokoa litšieeng tsa boeta-pele. O itse tseo ke bohlale ba semoea le semelo sa motho.
