LEPHEMA O TŠEPISA HO NTLAFATSA SEPOLESA
La 9 Phuptjane 2023
Maemo a tšebetso sepoleseng a hlobaetsa; ha ho lisebelisoa tse thusang mapolesa ho etsa mosebetsi naha ka bophara.
Letona la Puso ea Libaka le Borena, Lekala la Lehae le Sepolesa, Lebona Lephema o arabile lipotso Ntlong ea Mahosona bekeng ena moo a neng a lokela ho hlalosa litaba tse amanang le tšebetso ea sepolesa. Lephema o boleletse ntlo hore mapolesa ha a na lisebelisoa tse kenyeletsang likoloi hara tse ling.
“Ke ne ke re ke il’o ba rekela lipere ba tle mpe ba tsamaee joale oa utloa le Tona-kholo o ile a ba phallela hore ba fumane sefofane ba se sebelise ka lihora tse itseng ’me ho ntse ho etsahala joalo.” Ke Lephema a hlalosa.
Lephema o boetse a tekela ntlo hore maikemisetso a lekala la habo ke ho thusa mapolesa ho fumana seaparo sa mosebetsi kaha ba hlobotse. O itse ba na le moralo oa ho bula setsi sa moroko moo mapolesa a tla ithokela junifomo.
“Re tlo etsa hore ba ithokele e le ho fokotsa mokhoa ona oa lithentara. Taba ea pele e tla ba ho fumana machabeng koana litsebi tse tlo ba koetlisa ho ithokela junifomo.” Ke eena eo.
Ntlheng ea ho hlomella sepolesa ka litsebo, Lephema o supile hore ba na le moralo oa hore mapolesa a tle a fuoe lithupelo khafetsa. Sena o re se etsoa ho ba hopotsa boikarabello ba bona ba ho hlokomela sechaba sa Basotho le thepa ea sona.
“Hajoale re letšolong la ho bona hore re ba batlela likoloi tseo ba tlo li sebelisa hore ba tle ba bonahale. Haufinyane ba tla bonahala hore mapolesa a teng Lesotho.” Oa hlalosa.
Lephema o itse ba tlo etsa sekoele ka ho bula sebaka sa ho teha makoloi a sepolesa Ha Mabote.
O ile a fera puo ka ho hlalosa lipalo-palo tsa litlolo tsa molao. “Ho tloha selemo sena se qalile, re bile le mafu a sethunya a 82. Hape ho bile le ba hlabuoeng ka lithipa ba 101 athe ba khakhathuoeng re bile le batho ba 31.” Lephema o lihella likhala.
