LEPHEMA O THIBELA ZODWA HO KENA LESOTHO
Ka Moipone Makhemeng
La 4 Phato 2023
Mosali oa Afrika Boroa, Zodwa Wa Bantu o ne a lokela ho ea natefisa moketeng o mong hosane sebakeng se bitsoang Elibo Guest House, Ha Seoli, Maseru.
Leha ho le joalo, ho bile le poboli e ileng ea tlola, ho hlaha mahlakoreng a mang a sechaba a neng a re ‘muso o hanele Zodwa ho tla Lesotho kaha a tantša a tsotse.
Har’a ba bileng khahlanong le ho tla hoa Zodwa Lesotho ke Lekhotla la Likereke la Lesotho (Christian Council of Lesotho). Baruti ba bang ba ile ba ngolla ‘muso lengolo ba kopa o thibele Zodwa ho etela naheng ena.
Ho sa le joalo, letona la lehae, Lebona Lephema o lokollotse lengolo le thibelang Zodwa ho kena Lesotho.
Lengolo leo Lephema o le ngolletse bookameli ba khoebo e amehang, Elibo Guest House ‘me le baleha joana: “Tseba hore mosali oa Afrika Boroa ea tsebahalang ka lebitso la Zodwa wa Bantu eo u mo memmeng ho tla Lesotho, o tla thibeloa ho kena kahara naha ena.
Lebona Lephema
Zodwa o tumme ka ho hloella kalaneng a tsotse a sa apara liphahlo tse hlomphehang mahlong a sechaba ‘me boitšoaro bona bo fahla mahlo a sechaba.
“Ho ea ka molao oa Pokello ea Litlolo tsa Molao oa 2010 (Penal Code Act, 2010) temana ea 56 e re motho ea hloellang kalana a fahla batho kapa ea etsang se fahlang mahlo a batho a le mong kapa mahlong a sechaba ka tsela e ka khupisang motho e mong o tlola molao.
“Ha re batle ho emela hore molao o tloloe. Ntle le hore molao oa naha o nena liketso tsa boitšoaro bo fahlang mahlo a sechaba, Lesotho ke naha ea Bokreste ‘me re boulella le ho boloka litšiea tsa Bokreste joaloka sechaba sa Bakreste kahoo ha re batle ho nyelisa litšiea tsa Bokreste.
Ke ‘ona mabaka a entseng hore mofumahatsana Zodwa a thibeloa ho kena Lesotho.” Lephema o rialo lengolong leo a le tekenetseng ka la 2 Phato 2023.
Ho sa le joalo, bookameli ba Elibo hona ka la 2 Phato 2023 bo ile ba lokolla polelo e hlakolang mokete ona mabaka e le poboli e hlahileng karolong e ‘ngoe ea sechaba.
Mookameli oa Elibo Guest House, Mpho Molefe puisanong le Leihlo la Basotho o re mokete o ne o hlophisitsoe ke motho e mong oa Gauteng, ea neng a kopile ho hira sebaka sa bona a memme libini. “Lehlakoreng la rona ke hore motho e mong o ne a hirile sebaka sena ho hlaha Gauteng a tlisa libini mona hoba Elibo e tsebahala ka ho ts’oara mekete e fapaneng.
Leha ho le joalo, moqolotsi o ile a ‘motsa hore na tlhakolo ea mokete e amme khoebo ea habo joang: “Ke phela kahara naha ea Lesotho, ke tataisoa ke melao ea naha ena. Melao e beuoeng re tlameha ho ikobela eona empa ka lehlakoreng la khoebo lefapha la khoebo ea boithabiso le hirile batho ba bangata haholo Lesotho mona. Re ka qala fats’e ho tloha ka bakhanni ba litekesi, batho ba hloekisang ho kenyeletsa le ba sebetsang litameneng ‘me kannete re amehile haholo.
