BO-MAPESELA BA HLAPANTŠOA PARAMENTENG
La 17 ’Mesa 2023
Thapameng ea kajeno maparamente a mane a nkile kano ea ho ba litho tsa paramente ea leshome le motso o mong ntlong ea bakhethoa ba sechaba.
Ho ea ka taelo ea Lekhotla le Phahameng, maparamente ana a laetsoe ho ntšoa ka paramententeng; Lebohang Mochaba oa Alliance of Democrats (AD), athe a Democratic Congress (DC) a felloang le boparamente kajeno ke bahlamphehi Katleho Mosotho, ‘Maletsema Lesoepa le Morapeli Motoboli.
Ba nkisitsoeng kano kajeno ke benghali Tefo Mapesela oa Basotho Progressive Party (BPP), Mohlominyane Tota oa United for Change (UFC), Paul Masiu oa Lesotho Peoples’ Congress (LPC) le mofumahali ’Masetota Leshota oa Basotho National Party (BNP).
Ho fokotsoa litulo hoa DC le AD ho latela nyeoe ea boiqoso e ileng ea hlahleloa ke Komisi e Ikemetseng ea Likhetho (IEC) e kopa hore lekhotla le e lumelle ho lokisa phoso ea ho aba litulo tsa khekhethane. Qeto ea Lekhotla le Phahameng e bile ho lumella IEC ho lokisa phoso ka tsela e seng e hlalositsoe kaholimo.
DC e ile ea hapa litulo tsa mabatooa tse 18 ’me IEC ea e abela litulo tse 11 tsa khekhethane ’me eaba kakaretso ea litulo tsa eona paramenteng e-ba 29. Phetoho ea phokotso ea litulo tse tharo tse neng li abiloe ka phoso e theolela litulo tsa DC ho 26. Ka lehlakoreng le leng, AD e ile ea hapa litulo tse peli tsa mabatooa ’me ea abeloa litulo tse tharo tsa khekhethane. Ka ho tšoana, ho amohuoa setulo ho siea AD ka litulo tse ’ne fela.
Ha li ke be li shoe ka leqhoa le le leng kaha BNP hlathe e lelekisa tsebe kaha tlhaphantšo ea mohlomphehi Leshota kajeno e nyollela palo ea litulo tsa khekhethane ho peli kaha setulo se seng ke sa moetapele Machesetsa Mofomobe. Mekha ea LPC, UFC le BPP eona e fumane matšeliso kaha e ne e se na boemeli ba letho ka ntlong ea bakhethoa ba sechaba.
Kamora ho nkisoa kano, motsamaisi oa ntlo ea bakhethoa, Tlohang Sekhamane o ile a lebohela maparamente a macha; a ba hlalosetsa hore ho khetheloa paramenteng ke ketsahalo e kholo bophelong ba motho.
