BAOKAMELI BA BEHELLOA KA THOKO CHANKANENG

BAOKAMELI BA BEHELLOA KA THOKO CHANKANENG

La 10 Pherekhong 2024

Liketsahalo tse bileng setsing sa tlhabollo ea batšoaruoa Maseru ka khoeli ea Tšitoe li bakile litaba kamora hore batšoaruoa ba tšeletseng ba thobe toronkong ba nt’o ipha limenyane ka la 21 Tšitoe 2023. Letsatsing le hlahlamang leo, ho boetse hoa senyeha ho litsoe ha balebeli ba khakhatha batšoaruoa ba bang bao e leng masole ka la 22 Tšitoe 2023.

Batšoaruoa ba ile ba hlaha Lekhotleng le Phahameng ka la 24 Tšitoe 2023 ba batla hore lekhotla le laele bookameli ba chankana ho ba isa lingakeng. Ba boetse ba bontša Moahloli ’Mabatšoeneng Hlaele litemalo tsa bona ka khotla. Bala litaba tseo 👉🏼 MONA. 

Maobane ka phirimana, Letona la Toka, Richard Ramoeletsi o lokollotse phatlalatso thelefishining ea ‘muso (LTV) a tlaleha hore ‘muso o nkile qeto ea ho behella ka thoko Mookameli oa Chankana ea Maseru hammoho (Tsoto Manaka) le Mookameli oa Sekolo sa Koetliso ea Balebeli ba Lichankana (Lipholo Nthako) ka thoko ho mosebetsi. O boletse seo se etsoa hoba lipatlisiso li thakhotsoe (tsa ho thoba hoa batšoaruoa le ho khakhathoa hoa ba bang). Ramoeletsi o boetse a tlaleha hore batšoaruoa ba neng ba balehile ba tšoeroe kaofela.

“Ke hlaha mona ho tsebisa sechaba qeto ea ho behella ka thoko liofisiri tse peli e leng Officer Commanding Maseru Correctional Institution le Mookameli Sekolong sa Koetliso ea Balebeli ba lichankana (Correctional Staff Training School) ha lipatlisiso li ntse li tsoela-pele.

“’Muso o boetse o hatetse-pele ho phethahatsa ho thehoa hoa Komisi e Ikemetseng ea Lipatlisiso (Independent Commission of Inquiry). Ha ke phethela ke lakatsa ho tiisetsa Basotho hore ‘muso o tla lula u le beha leseling ka tse amanang le setsi sa tlhabollo ea batšoaruoa.” Ramoeletsi o rialo.

Pejana Mokhatlo oa Liakhente tsa Lesotho (Law Society) o ile oa etsa khoelehetso ea hore Mookameli oa Litsi tsa Tlhabollo ea Batšoaruoa, Mating Nkakala a hlabisoe thoto ka monkhoane ka le reng o hlotsoe ke mosebetsi.