MOZAMBIQUE E APARELOA KE LERU LE LETŠO

MOZAMBIQUE E APARELOA KE LERU LE LETŠO

… NTOA EA ISRAEL E NAMELA TENG

La 10 Pherekhong 2024

Lebotho la ntoa la Masolomane (Islamic State – IS) ka la 4 Pherekhong 2024 le phatlalalitse letšolo le lecha ka sepheo sa ho bolaea. IS e re litlhaselo tsa borabele li tla phahama lefatšeng e le ho tseka mafu a bahlabani ba bona ba fenethiloeng linaheng tse ling joaloka Afghanistan moo ho ileng hoa bolaoa batho ba 84. Raliphatlalatso oa IS, Abu Hudhayfah al-Ansari o itse ba tlo sebelisa leano la ‘ba bolaee hohle moo u ba fumanang’ (kill them wherever you find them campaign).

Ho feta mona, IS e tseka hore Israel e ile ea hlasela ofisi ea mokhatlo oa ntoa oa Palestina – Hamas naheng ea Lebanon ea bolaea motlatsi oa moetapele oa Hamas; Saleh al-Arouri. Sepheo sa letšolo la ‘ba bolaee hohle moo u kapanang le bona’ ke ho iphetetsa.

Ho sa le joalo, taelo ea ho rinya batho e nametse le Mozambique moo marabele esale 2024 e thoasa a tsoileng letšolo ho bolaea batho ka sehloho.

Tlhaselo ea pele e bile motseng oa Ntotwe seterekeng sa in Mocímboa da Praia. Mona marabele a fenethile moshanyana le ntate-moholo, a boela a chesa matlo.

Boha litšoantšo tsa matlo a chesitsoeng ke likhukhuni ka tlaase:

Letsatsi le hlahlamang, marabele a boetse a hlasela motse oa Chai, Macomia a fenetha motho a le mong. A boetse a hotetsa matlo. Liketsoana tse peli tsa sesole sa Mozambique li ile tsa hlaseloa ‘me hoa shoa lesole lebopong la leoatle ka thokonyana ho toropo ea Mocímboa da Praia. Tsena li etsahala letšolong leo la ‘kill them wherever you find them.’

Boemo ba tšireletso porofinsing ea Cabo Delgado bo bonahala bo nyotobela kaha marabele a boetse a hlasela liahelo tse peli tsa sesole sa Mozambique moo a fenethileng kakaretso ea masole a 13 ka la 26 Tšitoe 2023.

Bekeng ena khapha-mali e tsoela-pele moo marabele a ikemiselitseng ho etsa mofela. Litlaleho tsa beke ena li supa likhukhuni li hlasetse liahelo tsa sesole sa Mozambique motseng oa 5th Congresso, Macomia ‘me tsa hapa moqeqeko oa libetsa ekasitana le ho chesa liahelo. Tlaleho e supa hape ho chesitsoe matlo a ka bang 50.

Ho boetse ho hlasetsoe motse oa Bakreste oa Cricao, Mocímboa da Praia ‘me matlo a 40 a chesoa kamor’a hore baahi ba qele ho leoto. Ho sa le joalo, Sesole sa SADC se ntse se fekha ntoa Mozambique ho leka ho tlisa botsitso. Sesole sa Lesotho se na le kampo seterekeng sa Nangade ‘me morao tjena litlhaselo tsa borabele li sa itse khoe!