BOLOETSOE O SUTUTSA LEPHEMA KA LIPASA
La 10 Pherekhong 2024
Monna oa Mosotho ea loanelang ho kenya ‘muso taolong le ho hlomphisa molao, monghali Kananelo Boloetse o ngolletse letona la Puso ea Libaka le Borena, Lekala la Lehae le Sepolesa, Lebona Lephema lengolo lebitsong la Mokhatlo o loanelang seriti le tlhompho ea molao oa motheo o bitsoang Section 2.
Boloetse lengolong lena o ipiletsa ho letona ho sebetsa taba ea tiehiso ea phano ea libukana ho sechaba. O boetse o lla ka khethollo eo a reng lekala la lehae le ea e etsa phanong ea libukana tsa ho eta.
Re ngongorehile haholo ke tiehiso eo re e bonang e hloka toka ebile e tletse khethollo phanong ea libukana tsa ho eta ho sechaba. Batho ba emela libukana nako e telele kamora ho etsa likopo le ho li lefella. Taba ena ke sesupo sa ho rapitlela litokelo tsa mantlha tsa botho. Bolokolohi ba motsamao hore motho a tsoe kahara naha ea habo ke tokelo ea mantlha ea botho ebile e hlaha likhoelehetsong tse ngata tsa machaba hammoho le ka molaong oa motheo oa Lesotho.” Lengolo la Boloetse le baleha joalo.
Boloetse o re tiehiso ea phano ea lipasa e sitisa sechaba ho phethahatsa tokelo ea sona ea mantlha ea botho e leng ea motsamao o lokolohileng. Sena se beha bophelo ba sechaba tlokotsing; haholo-holo batho ba lokelang ho ea lingakeng kantle ho naha.
Lebona Lephema, letona la Puso ea Libaka le Borena, Lekala la Lehae le Sepolesa
O boela a hlokomelisa Lephema hore kaha maemo a tlhokahalo ea mosebetsi a rena Lesotho, ho molemo ho se iphethole lejoe la khupiso ka ho sitisa batho ho ipatlela mosebetsi Afrika Boroa.
Ho molemo ho thusa sechaba ho ea batla mosebetsi e seng o sitise sechaba ho ipatlela mosebetsi. Ntho ena ea tiehiso ea phano ea lipasa ha e bake mathata a moruo feela empa e susumetsa hore batho ba bang ba ikhethele ho tšela malibohong ka likhoroana tsa matsa. Ba leketlisa bophelo ba bona selomong hammoho le ho itheola seriti. Ho bile le litlaleho tse sisimosang moo basali ba ileng ba fumanoa ba tšela linokeng eaba ba khakhathoa. Batho ba boetse ba shoele ka sehlooho nokeng ea Mohokare linakong tse fetileng ha ba leka ho tšela noka. Tsena tsohle ke litholoana tse bosula tsa tiehiso ea phano ea libukana tsa ho eta. Re ipiletsa ho uena hore hang-hang u nyakurele taba ena. Re le Section 2, re lebelletse hore kamora matsatsi a 15 ho be ho na le tema e bonahalang tabeng ena ea bohlokoa.” Ke boipiletso lengolong.
Ntlheng ea leeme le khethollo tse etsoang ke lekala phanong ea libukana, Boloetse o re ba hlakometse hore batho ba hafang ka nkatana ba lefisoang M650 ea hore lipasa tsa bona li tsoe ka nako e khutšoane ho feta ba bang ka le reng lipasa tse joalo ke tse fanoang maemong a tšohanyetso. Leha ho le joalo, Section 2 e re taba eo e lokela ho emisoa hoba e na le letsuka la khethollo.
Kananelo Boloetse [Image -Khotsofalang Koloi/The Post]
Letona Lephema, re u khothalletsa hore ka potlako u lokise maemo a mabe ana a hlokang toka. Lekala la Lehae le lokela ho sebetsa ka ponaletso, ka potlako le tekano hore Basotho ba fumantšoe libukana tsa ho eta ka nako ho sa tsotellehe bokhoni ba bona cheleteng.”
Ha a fera lengolo, Boloetse o re ho ea ka Temana ea 17 (1) ea Molao oa Libukana tsa ho Eta (Lesotho Passports and Travel Documents Act, 2018) letona la lehae le tlameha ho fana ka tlaleho e bontšang lenane la lipasa tse fanoeng, tse khutlisitsoeng kapa tse sentsoeng kapa litokomane tse ling tse amanang le libukana tsa ho eta ho paramente. Sena se tlameha ho etsoa nako ea likhoeli tse tšeletseng kamora ho fela hoa selemo sa ‘muso.
Re batla tlhaloso hore na taba ena ea tlaleho ea lipasa na u s’u e teketse paramente joalokaha molao o supa. Haeba ha ho joalo, re tla lakatsa ho fuoa tlhaloso ea tieho ea ho teka tlaleho paramenteng.” Lengolo le phetheloa ka tsela eo.
Ho sa le joalo, nako eo Section 2 e neng e e file letona hore le sebetse litaba tsena ea matsatsi a 15 e felile ‘me Section 2 ha e ea khotsofala. Kutloisiso ke hore bo-Boloetse ba tla ea kopa bonamoli paramenteng.
