BATŠOARUOA BA MASOLE BA PHETA MASISA-PELO
La 24 Tšitoe 2023
Ka moqolotsi oa rona
Private Liphapang Sefako (54), e mong oa batšoaruoa ba masole ba emetseng linyeoe chankaneng e kholo ea Maseru o bolelletse moahloli ‘Mabatšoaneng Hlaele oa lekhotla le phahameng se ileng sa etsahala mohla ba khakhathoang ke balebeli ba chankana ka la 22 Tšitoe 2023.
![](https://leihlolabasotho.co.ls/wp-content/uploads/2023/12/Private-Liphapang-Sefako-o-re-o-tsebile-balebeli-ba-babeli-ba-mo-tokholitseng-.jpg)
Private Liphapang Sefako o re o tsebile balebeli ba babeli ba mo tokholitseng [Image – Public Eye]
Ho bile le batšoaruoa ba tšeletseng ba ileng ba thoba chankaneng eo bosiung ba la 21 Tšitoe 2022 ’me ba bang ba bona ba ile ba tšoaroa hape.
Lekhotla le ile la laela batšoaruoa ho hlalosa le ho bontša litemalo tsa bona. Batšoaruoa ba amehang ke ba latelang: Leutsoa Motsieloa, Marasi ‘Moleli, Nthatakane Motanyane, Tieho Tekiso, Sebilo Sebilo, Litekanyo Nyakane, Mahlomola Makhoali, Mahlehle Moeletsi le Liphapang Sefako.
Motšoaruoa Liphapang Sefako o hlaloselitse lekhotla se etsahetseng mohla letsatsi leo: “Ka la 22 Tšitoe 2023 lipakeng tsa 10am le 11am ho ile hoa fihla makostabole a ka bang 15 ka setokising seo ke neng ke koalletsoe ho sona le babang.
![](https://leihlolabasotho.co.ls/wp-content/uploads/2023/12/Judge-Mabatsoeneng-Hlaele-U89.jpg)
Moahloli Mabatšoeneng Hlaele
“Ha ba kena ba ile ba re re tšoare lebota ‘me ke ile ka lumela ho le tšoara hoba ka tloaelo ha ba re secha ba re re tšoare lebota. Ke ile ka ba furalla ka tšoara lebota ka matsoho. Ke moo ke ileng ka utloa ba se ntse ba re khakhatha, ‘me eo ke ‘moneng le ho tseba lebitso la hae o ne a nkile koto ‘me lebitso la hae Khuso Mohale. Ke mo tsebile hoba pele a ea ho recruitment o ne a sebetsa le rona e le molebeli ka chankaneng.” O rialo.
“E mong eo ke tsebileng lebitso la hae ea re khakhathileng ke Sekokotoana. Ke utlouoe thekeng ka koto ‘me ke ruruhile.” Sefako o rialo.
O re o sa le motala thekeng hape lesapo la hae la mokokotlo le bohloko hoo a sitoang ho inama. “Ke na le bothata hape lengoleng kaha Khuso Mohale o nkotlile ka koto hona mono. Lengole le ruruhile.” O phethela joalo a re o kopa ho mookameli oa toronko a mo lokolle ho bona ngaka.
Ho sa le joalo, batšoaruoa ba bang ba masole ba boleletse lekhotla hore ba lemetse joang mohla ba khakhathoang ka letsatsi le tšoanang.
Leutsoa Motsieloa (37) o bolelletse lekhotla hore o na le bohloko mokokotlong hammoho le bohloko manonyeletsong a qholo ka lehlakore le letšehali. O teketse lekhotla hore bothata bona bo bakile hore a hlotse h’a tsamaea. “Ke bile tjena kamora ho tetekoa ke bahlanka ba lichankana ka la 22 Tšitoe 2023 ka bo-hora ea 11am hoseng.” Motsieloa o tekela lekhotla joalo.
![](https://leihlolabasotho.co.ls/wp-content/uploads/2023/12/Leutsoa-Motsieloa-ke-e-mong-oa-batsoaruoa-.jpg)
Leutsoa Motsieloa ke e mong oa bats’oaruoa [ [Image – Public Eye]
Nthatakane Motanyane (30) eena o supile a na le maqeba a mabeli hloohong; a re le leng le rokuoe ha le leng le pechuoe feela. “Hape ke na le bothata ka litsebeng ka mona – ho na le molumo ebile ha motho a bua ha ke mo utloe hantle. Mahlo a ka a na le ‘mala o mofubelu ‘me ha a tjena ka tlholeho. Ke tsoile mali a mangata; e mong oa bakhakhathi ba ka o ile a ntšela ka metsi, a batla ho a hlatsoa.
![](https://leihlolabasotho.co.ls/wp-content/uploads/2023/12/Nthatakane-Motanyane-o-re-o-lemetse-hloohong-tt.png)
Nthatakane Motanyane [Image Public Eye]
![](https://leihlolabasotho.co.ls/wp-content/uploads/2023/12/Tieho-Tikiso.jpg-FDDD.jpg)
Tieho Tikiso [Image Public Eye]
![](https://leihlolabasotho.co.ls/wp-content/uploads/2023/12/Sebilo-Sebilo-o-tsamaea-ka-lithupa-hape-o-lemetse-sephakeng-.jpg)
Sebilo Sebilo o tsamaea ka lithupa hape o lemetse sephakeng [Image – Public Eye]
Litekanyo Nyakane (44) eena o re hlooho ea hae e bohloko kaofela leha ho se maqeba a bonahalang. O boetse o hlalositse a na le leqeba leihlong le letona. “Ke ruruhile sephaka sa letsoho le letona hape ke na le mahlaba ka hanong kaha ke ile ka itoma ha re ntse re khakhathoa.”
![](https://leihlolabasotho.co.ls/wp-content/uploads/2023/12/Captain-Litekanyo-Nyakane-o-bontsa-lekhotla-hore-o-lemetse-leihlong-.jpg)
Captain Litekanyo Nyakane o bonts’a lekhotla hore o lemetse leihlong [Image – Public Eye]
Mahlomola Makhoali (38) o itse o na le maqeba a bonahalang le a sa bonahaleng. Letsohong le letšehali, o re o khakhathuoe ka molamu. O boetse a hlalosa hore o lokela ho kokomosa ha a sesa. O re ha mosese o tsoa, ho oa chesa. O re bakhakhathi ba ne ba nkile melamu le mapolanka.
![](https://leihlolabasotho.co.ls/wp-content/uploads/2023/12/Mahlomola-Makhoali-fffffooioiiiii.jpg)
Mahlomola Makhoali [Image-Public Eye]
![](https://leihlolabasotho.co.ls/wp-content/uploads/2023/12/Captain-Mahlehle-Moeletsi-o-re-eena-ha-a-na-maqeba-empa-o-na-le-maqeba-moeeng-.jpg)
Captain Mahlehle Moeletsi o re eena ha a na maqeba empa o na le maqeba moeeng [Image – Public Eye]