MOQHOBI OA 4+1 O BEHA LEPOLESA NTŠING TSA LEFU
Ka Moipone Makhemeng
La 19 Tšitoe 2023
Moqhobi oa 4+1, Keketso Makara (34) oa Thabana Morena, Mafeteng ha morena Seeiso Lerotholi ea lulang Ha Mabote, Berea, o kene chankaneng kamora ho chaisa ka bohlasoa ofisiri ea sepolesa e neng e ntse e laola sephethephethe tseleng ea sechaba ea A1 haufi le Ha Masilo, Motimposo ‘me a leketlisa bophelo ba lepolesa ntšing tsa lefu.
Makara o lebile chankaneng kamora ho hlaha ha khutšoane lekhotleng la Maseterata Maseru maoba. O balletsoe liqoso tse tharo ke ‘maseterata Motlatsi Kolisang. Liqoso tse mo tjametseng ke ho chaisa lepolesa ka bohlasoa ekasitana le ho le nts’a likotsi, ho qhoba koloi a se na lakesense ea ho qhoba ekasitana le ho e qhoba a se na polomiti e mo lumellang ho tsamaisa baeti ka koloi.
Lengolo la qoso le re; “Ka la 15 Tšitoe 2023 haufi kapa Ha Masilo, Motimposo, Maseru moqosuoa o ile a khanna koloi ea Honda Fit ea 4+1 ea nomoro-polata ea A56 BCV ka bohlasoa. Ka lebaka leo, o ile a chaisa Linalebalisa Sekonyela ea sebetsang e le lepolesa la sephethephethe le neng le le mosebetsing le laola sephethephethe tseleng e boletsoeng ea sechaba.”
E mong oa balaola-sephethe-phethe mosebetsing
Lepolesa hajoale le hlalosoa ke mochochisi Motiki le ntse le loanela bophelo ba lona sepetlele. Kahona o ile a kopa hore moqosuoa a se fuoe beile a tsoe a bolokiloe sebakeng sa batšoaruoa ha a ntse a emetse letsatsi la nyeoe.
