MOTHOBI O TORONKELA THAPO EA MOTLAKASE
Ka Moipone Makhemeng
La 17 Phato 2023
Mohlankana oa Mosotho ea qosoang ka bosholu ba thapo ea motlakase, e hakanyetsoang boleng ba M3000 oa Tšenola, Maseru ha Morena Khoabane Theko, Kananelo Mothobi (22) o hlahile ka pele ho ’Maseterata oa Maseru, ’Mamorojele Qoo le mochochisi Rabale moo a ipoletseng a le molato.
Bopaki bo teketsoeng lekhotla ke hore monna oa Mosotho oa Mafeteng ea sebetsang MM Security Company, Samuel Mantsi (35) ea sebetsang Maseru Mall o bontšitse hore ka la 14 Phato 2023 o ne a le mosebetsing setsing sa mabenkele se boletsoeng lipakeng tsa 6pm le 7pm.
Bopaki ba hae bo ngotsoeng ke sepolesa ke bona: “Monna e mong o ile a fihla a re o ntse a lokisa siling lebenkeleng le leng Maseru Mall. Ke ile ka lumella monna eo hore a kene kaha ke ne ke tseba hore mabenkele a mang a ntse a nchafatsoa. Kamora nako e itseng, ke ile ka ea paterola mabenkeleng ao empa ka makala ha ke kopana le monna eo ke mo lumelletseng ho kena a tšoere thapo e ntšo le kharafu.
“Ke ile ka mo botsa ka thepa e neng e le matsohong a hae eaba ke leka ho hula ho monna eo ‘me ka utloa thapo e chesa.” Bopaki ba molebeli bo teketsoeng lekhotla bo rialo.
Ho ea ka Mantsi, moqosuoa o ile a fana ka likarabo tse sa khotsofatseng, kahona a mo nkela ofising ea hae ho basebetsi-‘moho le eena. Ke moo ba ileng ba tsebisa monna oa Masowe 3 monghali Senatla Senatla (45) ea sebetsang Maseru Mall e le mokontereka ka la 15 Phato 2023 ‘me sepolesa sa tlaleheloa lietsahala.
Thapo ea motlakase le kharafu li sebelisitsoe e le lipontšuoa ka khotla. Moqosuoa h’a ka latola hore efeela a utsoitse. Mothobi o ne a ipuella ka khotla ‘me ha a fana ka mabaka a ka bebofatsang kotlo ea hae o boletse hore ke lekhetlo la hae la pele a etsa tlolo ea molao. O itse o soabetse liketso tsa hae, ka hona a ke ke a hlola a li pheta hape. Ho feta mona, o hlalositse a na le ngoana eo a mo phelisang.
’Maseterata Qoo ha a fana ka kotlo o itse moqosuoa a lefe chelete e kaalo ka M3000 kapa a hoehle lilemo tse ‘ne chankaneng, leha ho le joalo selemo se seng o ile a se fanyeha. Mothobi o ile a hloleha ho itefella, kahona a leba tlhabollong ea batšoaruoa.
