BAKHETHOA BA RFP BA BILETSOA KOMITING EA KHALEMO
La 17 Phato 2023
Ka Moipone Makhemeng
Tulong ea paramente bekeng ena, ka la 15 Phato 2023, maparamente a Revolution for Prosperity (RFP) a mararo a ile tsoa RFP tlaase ka ho vouta le bohanyetsi. Motlatsi oa Motsamaisi oa Lipuisano ka paramenteng, Tšepang Tšita-Mosena o ile a kopa maparamente a ‘muso le bohanyetsi ho vouta ho lumella moeta-pele oa Ntlo, Nthomeng Majara ho phomotsa ntlo ho fihlela ka la 22 Phato 2023.
Bohanyetsi bo ne bo hanana le seo bo re ntlo e phomotsoe hofihlela nyeoe e qholotsang pulo e ikhethang ea paramente e fela ka makhotleng. Leha ho le joalo, bohanyetsi bo ile ba hloloa ke ba ‘muso.
Bahlomphehi bao ke Thuso Makhalanyane oa lebatooa la Abia, Rethabile Letlailana oa Lithoteng le Dr. Mahali Phamotse oa Matlakeng.
Dr. Mahali Phamotse le bakhothaletsuoa ba RFP
RFP e koatile ka hore boraro bona ke mahlaba-phieo kahona ba tlil’o khalengoa. Maparamente ao a tetuoe ka mangolo a ba bitsetsang tulong ea khalemo ka la 19 Phato 2023 ntlo-kholo ea RFP, Maseru.
Ho ea ka lengolo le ngoletsoeng Dr. Phamotse, khalemo e tla tobana le boitšoaro bo bobe boo ho boleloang a bo hlahisa khahlanong le mokha. O tobane le liqoso tse tharo e leng; boitšoaro bo hlephileng ebile bo sa amohelehe, ho hulanya lebitso la RFP seretseng le ho se tšepahale. Lengolo le re Dr. Phamotse o tseba ka botlalo hore lipehelo tsa molao oa motheo oa RFP poleloana ea 8 le 13 li sebetsa ho litho tsohle tsa RFP ke ka hona a tobaneng le liqoso tse boletsoeng.
Lengolo le baleha tjena; “Boitšoaro bo sa lokang bo sa amoheleheng: Ka la 10 ‘Mesa 2023 u ile oa mema baetapele ba mekha ea bohanyetsi moketeng oa teboho lebatooeng la hau la Matlakeng u sa tsebisa Komiti ea Phethahatso ea RFP ‘me u ntse seo ka maikemisetso a ho hobosa RFP le boetapele ba eona.
Boitšoaro ba hau bo boletsoeng ka holimo bo ne bo sa loka ‘me ka hona u entse tlolo ea molao mabapi le boitšoaro ho ea ka temana ea 13(a) (1) ea molao oa motheo oa RFP.
“Mahlabisa-lihlong le ho hulanya seriti sa RFP seretseng; kamora mokete o neng o tšoaretsoe Matlakeng, u ile oa bua seea-le-moeeng sa Moafrika oa bolela hore u khethiloe u le setho sa Paramente ke litho tse seng kae tsa RFP empa boholo ba batho ba u khethileng e ne e le bakhethi ba mekha e meng ea lipolotiki.
“Ho se tšepahale; liketso tsa hau tsa ho khetha khahlanong le boemo ba ‘muso ba mokha Paramenteng ka la 15 Phato 2023. Liketso tsa hau li tlola melao le melaoana ea mokha, haholo-holo ho ea ka melaoana ea 13 (a) (1) molaoana oa 8 (b) joalo ka ha o hlalositsoe Molaotheong oa mokha.” Lengolo la liqoso le baleha joalo.
Ho sa le joalo, Monghali Makhalanyane eena o tobane le liqoso tse latelang: ho hana ho ikobela litaelo tsa moeta-pele, ho tšosa ka hore o tla tšela ka paramenteng, boitšoaro bo hlephileng le ho hloka botšepehi. Ho sa le joalo, monghali Makhalanyane o na le khanyetso mabapi le liqoso tsa hae kaha a re o batla ho hlakisetsoa liqoso tseo ho boleloang a li entse. Tsena li hlahella lengolong leo a le ngotseng kajeno.
