LEKHOMOSHA LE PHETA MASISA-PELO KA MOKOTING
La 7 Phupu 2023
E mong oa banna ba Lesotho ba phonyohileng mohla koluoa e ba oelang ka chafong ea mokoti oa morafo oa Virginia No. 5, Harmony, Welkom ka la 17 Motšeanong 2023 o boleletse koranta ea Afrika Boroa, Eyewitness News hore kelello ea hae e senyehile ke pono eo a e boneng ka mokoting ha ba lo ntša litopo.
Monna enoa ea sa ratang ho tsejoa ka lebitso o re mohla tsietsi ho ile hoa fihla likoloi tsa morafo li nkile balebeli ba moo. O re balebeli bao ba akhetse liboomo ka mokoting. “Ha se ‘nete hore kotsi e bakiloe ke khase ea mokoti (methane gas). Ho akhetsoe liboomo tse ileng tsa phahloha tsa re chesa.” O rialo a ipata ka mahlong nakong eo a ntseng a bua le moqolotsi.
Lehlatsipa lena le boetse le tlalehoa le na le lipha tsa ho cha sefahlehong.
“Hang hoba likoloi li furalle ho ile hoa foqoha mosi le ho phahloha ka mokoting. Batho ba neng ba shebelletse (litlhoeli tsa bona tse neng li lutse kantle ho mokoti) ba le haufi ba ile ba re joetsa hore beng ba morafo ho na le ntho eo ba e akhetseng ka mokoting ka mono.” O tsoela-pele
U KA BOELA OA BALA LITABA TSE AMANANG LE TSENA:
- BASOTHO BA 31 BA SHOELLA MORAFONG, WELKOM
- ‘MUSO O TŠELA MALAPA A BAFU BA 31 KA METSI
- TSE KHOTHATSANG HO MALAPA A BAFU BA MAKHOMOSHA A 31
- HO NA LE BATHO BA NTSENG BA PHELA KA MOKOTING
- ‘MUSO O TSOA PUO KA KOLUOA TSA BASOTHO RSA
O hlalositse hore har’a bafu bao ho na le bana babo ba bararo. “Ke ne nke ke ka khutlela Lesotho ke sa ntša litopo tsa bona le bo-mphato kaofela. Banna bano ba chele letlalo ‘me re lekile ho ntša litopo tse tharo empa monko o ka mono ke o bohloko ka tsela e sisimosang pelo. Li senyehile; ha li sa shebeha litopo.” O phethela puo ea hae.
Leha ho le joalo, bookameli ba morafo bo itatola bosehla hore bo akhetse liboomo ka mokoting ho rinya bao. “Re ke ke ra etsa ntho e mpe joalo, batho ba reng re entse joalo, ba hloka boikarabello.” Ho rialo sebuelli sa morafo, Moeketsi Manoeli.
Hofihlela joale, har’a litopo tse 31, ho tsoile tse tharo feela, li ntšoa ke ‘ona makhomosha. Tse 28 li ntse li tšoasehile mpeng ea lefatše. ‘Muso oa Lesotho o ile oa kopa oa Afrika Boroa ho thusetsa hore li nyolloe. Letona la Lirafshoa la Afrika Boroa, Gwede Mantashe beke e fetileng o tšepisitse hore ba tla bona hore litopo kaofela li’a nyolloa. Empa Mantashe o re ho sa le thata hajoale ho ntša litopo ka lebaka la maemo a holimo a khase ka mokoting.
O bile a re ba hanane le letona la lirafshoa la Lesotho, Mohlomi Moleko ea neng a re ho lumelloe makhomosha a mang ho ntša litopo. Mantashe o ile a tsitlalla a re bona ke ‘muso ba ke ke ba lumella hore batho ba bang ba lo shoella ka mokoting ka moo hape.
