MOKHETHOA O RE BEILE E FETOLOE
… LIKAHLOLO TSA LIPOLAO LI BE BOIMA
Ka ‘Maleboka Makhemeng
La 4 Motšeanong 2023
Mokhethoa oa lebatooa la ‘Maliepetsane #55 Ntlong ea Bakhethoa, Mohlomphehi Lehlohonolo Hlapisi maobane o tekile setšoantšo sa molao ka tsela e ikhethileng (Private Members’ Bill) ho latela molao oa tsamaiso oa paramente oa 52 (1).
Setšoantšo sena sa molao se bitsoa Sehlomathiso sa Molao oa Tšireletso ea Lehae ea Lithunya le Mahlahahlela sa 2023 (Internal Security Arms and Ammunition (Amendment) Bill, 2023).
Lehlonolo Hlapisi, Mokhethoa oa ‘Maliepetsane [Foto, Parliament]
Mohlomphehi Hlapisi ha a tšetleha mabaka holim’a tšisinyo ena, o boletse hore ba etsang litlolo tsa molao ka lithunya, ha ba na lihlong ebile ba nolofalloa ho kena mabenkeleng a maholo ba ripitle le hona ho rinya batho ba qetelle ka ho ba bolaea.
Ho sa le joalo, mohlomphehi Lekhetho Rakuoane o ile a tlatsa ka matla a moholo tšisinyo ena ka le reng litlolo tsohle tsa molao tse entsoeng ka lithunya, makhotla a lome bebebe ka mokhoa o tšosang ha a fana ka likahlolo.
O ile a bontša hore sena se tla tlisa tšepo ho sechaba kaha le sona se tšoenyehile haholo ke chelete e fokolang ea beile e fanoang ke makhotla.
Ka mokhoa o tšoanang, mohlomphehi Machesetsa Mofomobe le eena ha a akhela molangoana, o tlatsitse tšisinyo e entsoeng ka le reng sena se tla kenya letsoalo ho litloli tsa molao tse bolaeang ka sethunya e re kaha hajoale ba bile ba ikotla lifuba ka hore ba tla timetsa batho ekasitana le ho ithorisa ka melomo ea bona hore ba tla ba toronkela.
Mohlomphehi Machesetsa Mofomobe, o ile a tlatsa tlhahiso
Ho sa le joalo moetapele oa Ntlo, Mohlomphehi Nthomeng Majara o ile a lemosa bahlomphehi hore beile ha se eona bothata kaha ha e fuoa batho ho ipapisoa le monahano oa hore ea fuoang beile ha a na molato pele lekhotla le ka mo fumana a le molato.
A boela a beha litho leseling hore lebaka leo beile e fanoang ka lona ke hore hofihlela lekhotla le fumane motho a le molato, ha se nepo hore ‘melaelloa a ka ahloloa ka ho bolokoa chankaneng le batšoaruoa ba seng ba fumanoe ba le molato. Ha a hatela pele o ile a bontša hore beile ha e na mathata ‘me a supa hore bothata ke linyeoe tse liehang ho kena makhotleng kaha li kena li le ngata.
Ha a phethela Majara o ile a kopa hore sehlomathiso sa tlhahiso ea Hlapisi se cheche hanyane kaha ho na le lintlha tseo ba batlang ho li lotomanya pele tabeng ena e le lehlakore la ‘muso.
