MAHONKO O KHAKOLA BUKA EA MORUO
Ka Moipone Makhemeng
La 31 Tlhakubele 2023
Monghali Khotso Mahonko (31), o khakotse buka e phuthetseng litaba tsa moruo kajeno ‘mokeng oo a neng a o epile oa baqolotsi ba litaba State Library, Maseru. Lebitso la buka ke ‘How Can Basotho Move to the Next Level Economically’. Mahonko o re leha buka lebitso e le la Sekhooa empa buka e ngotsoe ka Sesotho.
Buka ena Mohonko o re sepheo sa eona ke ho phephetsa menahano ea Basotho mabapi le litaba tsa khoebo le moruo.
Monghali Mahonko o re ho fihlile tlhokomelong ea hae hore Basotho ha ba kena likhoebong tse kholo, hoba likhoebo tse joalo li tšoeroe ke mehlobo e hlahang kantle ho naha ‘me seo ke sona se mo susumelitseng ho ngola buka ena.
Mahonko o re likhoebo tsa Basotho li sebeletsa maphepheng a lipolasitiki le mek’huk’hung ‘me sena se ruta bana ba naha ena ho hola ba na le menahano ea hore batho ba basoeu ke baokameli ba bona.
Ka ho khetholoha, sengoli Mahonko o bontšitse hore le likobo tseo Basotho ba ikhethollang ka tsona machabeng e leng Seana-Marena le tse ling, li hlaha kantle ho naha kaha ha ho moo li etsoang naheng ena.
Ha a tsoelapele o boetse o otlollotse hore moruo oa naha o jeroe ke likhoebo e leng ‘maraka, moo teng a supileng hore ka letsatsi feela chelete e bokelloang ho korosari feela ke M28 bilone. A re leha ho le joalo, polotiki ke eona eo Basotho ba tsepamisitseng maikutlo a bona ho eona.
A re ke merero e mengata eo a ileng a ikakhela ka setotsoana ho eona empa ha e ea ka ea atleha ka lebaka feela la seueso-ueso se sebetsang ka hare ho naha ena.
A re ha motho a se na bao a ba tsebang ba matleng ho thata ho fihlela litaba-tabelo tsa hae haholo khoebong. A supa hore bothata ba kobo-ea-khomo bo sitisang Basotho ho qala likhoebo ke bohloki ba chelete e qalang likhoebo.
O entse mohlala ka eona buka ena eo a e khakolang hore o ile a ngolla likhoebo ka ho fapana ho kopa tšehetso, leha ho le joalo o khutlile feela le moo a neng a tšepile.
Ho sa le joalo, o totobalitse hore buka ena e tla araba liqholotso tse joalo ‘me e fane le ka litharollo mabapi le liqholotso tsena.
Ho ea ka Mahonko, buka ena e tla fumaneha ka hare ho naha mabenkeleng a thekiso ea libuka joaloka Mazenod Book Centre. Mahonko o re o ngotse buka ea hae ka Sesotho e leng puo eo Basotho bohle ba tla e utloisisa kaha e le ea bona.
NALANE EA SENGOLI
Monghali Mahonko o hlahetse Sebetia, Ha ‘Makhoroana, Berea ‘me o kene sekolo sa mathomo, Sebetia Primary School, a nt’o fetela Lesia High School. O boetse hape ke setsebi sa kelello (Psychologist) kaha o na le Diploma in Psychology ho hlaha setsing sa thuto ka ngollano Alison se fumanehang naheng ea Ireland.
Hajoale o ntse a imatlafatsa lithutong tsa liphuputso tsa moruo (Economic Research). O boetse o bile National University of Lesotho a ithutela Bachelor of Arts (Linguistics, English Language and Literature) empa ka mabaka o ile a panolla kamora lilemo tse tharo.
