BO-MOJAPELA BA HULA TŠISINYO EA HO HLAKOLA M5000 EA MAPARAMENTE
Ka Moipone Makhemeng
La 22 Tlhakubele 2023
Pejana mokhethoa oa lebatooa la Motete, ebile e le moetapele oa Socialist Revolutionaries (SR), Mohlomphehi Teboho Mojapela a tlatsane le moetapele oa Popular Front for Democracy (PFD), Mohlomphehi Lekhetho Rakuoane ba ile ba kenya tšisinyo hore paramente e khaole tse ling tsa litsiane tsa maparamente le bahlomphehi ba bang tse kenyeletsang M5000 ea mafura eo Maparamente le litho tsa Senate ba iphang eona khoeli le khoeli.
Tulong ea Ntlo ka la 17 Tlhakubele 2023, litho tsa Ntlo ea Bakhethoa li ile tsa chaela monoana ka likobong ha Rakuoane a betsa hlanaphetho a hula tšisinyo ea bona le Mojapela.
Ha a teka mabaka a ho hula tšisinyo Rakuoane ea neng a le mong tulong eo ha ‘mphato oa hae Mojapela a ne a le sieo o teketse Ntlo puo mabaka a ho hula tšisinyo ea bona.
“Mohlomphehi Motsamaisi oa Lipuisano, ha ke lebohe Ntate. Morero oa ka e tla ba hore ke tle ke qetelle ke hutse tlhahiso ena empa ke tla beha mabaka pele ke etsa official withdrawal of the motion.
“Lebaka la pele ke hore, monga tšisinyo ea ka sehloohong (Mojapela) eo re sebetsang le eena ha a eo kajeno ‘me ke belaela hore mohlomong motion ona o tla tloha o ntsietsa joale ha ke se ke le mong, hobane ha ke na ea tla ntlatsa ea lokisitsoeng mona. Re ne re lokisitse re le babeli tjena hore e mong o tla sisinya joale e mong a mo tlatse.” Ke Rakuoane a tekela paramente mabaka a ho hula tšisinyo.
Lebaka la bobeli leo Rakuoane a le rapalalitseng ke hore melaoana e fang maparamente meropotso e tlo felloa ke nako ha khoeli ea Tlhakubele e kolumela ‘me a re ba kopane le lehlakore la ‘muso ho shebisana taba ena. A re ka mohlomong ba tla iphumana ba betsa makotofa moeeng hoba ‘muso o se o kentse liphetoho tse hlakotseng meropotso eo ba neng ba batla hore e hlakoloe.
O tsoela-pele: “Re ile ra bontšana hore hantle melaoana ena nako ea eona e se e saletsoe ke beke kapa beke le halofo e oela. Ke selemo se secha re lebelletse Government Gazette ka ‘Mesa. Mohlomong re ka qetella re fumana re ntse re betsa makotofa moeeng, hobane joale ho se ntse ho tla melaoana e mecha le standard seo re sebetsang ka sona.
“Ka April re tle re lebelle Government Gazette e ncha ena ea meropotso eo re tla lebella hore na e tla be e beuoe ka tsela efeng, na litaba tse ntse li etsa hore ebe re beile motion ona li tla ‘ne li be teng kapa joang.”
“Lebaka le leng ke hore motho u ntse u lumela hore Lehlakore la ‘Muso le tla boela le lumele hore re etse li-reform hobane e ‘ngoe e re bakelang litaba tsena tsa meropotso ke hore rea ingoathela.
“Ho ingoathela ke hore Government e na le Parliament le li-Authority tse etsang tšebetso, ke tsona tseo even including their own wages tseo ba iphang tsona. Ha u sheba li-reform there should be a Commission e itseng e laolang meropotso e joalo.
“Ka mantsoe ana, Mohlomphehi, ke hula motion ona for now, o sa ntsane o hutsoe re tla bona hore na ebe o tla khutla na. Ke lebohile, Mohlomphehi.” Rakuoane o menyeletsa maritsa joalo ‘me maparamente a mang a shebahetse a khotsofetse ha tlhahiso e huloa.
Ho sa le joalo, puisanong le koranta ena, Mojapela o itse mabaka a ho hula tšisinyo ea bona ke ‘ona a rapalalitsoeng ke Rakuoane paramenteng ‘me a thatiselletsa ka hore ba emetse hore ba bone hore na ‘muso o tla qala pele o hlakole meropotso eo ka ‘Mesa ‘me ha ba sa etse joalo o lekanya hore ba tla hlahlela motion hape.
