MORUTI O QOSOA KA HO NYALISA MOFU
Ka Moipone Makhemeng
La 20 Hlakola 2024
Moruti Lethoko James Jasong (75) oa Sekoting, Ha Ts’iu, Maseru o qosoa ka ho nyalisa mofu Khunonyane Mokhethi le mosali ea bitsoang ‘Mantsapo Leoma (42) ngoahola ka khoeli ea Ts’itoe. Tlaleho e supa mofu Mokhethi a ile a timela ka selemo sa 2022. Nyeoe e mametsoe ke ‘maseterata Itumeleng Letsika, ha mochochisi e le Motiki.
‘Mantsapo Leoma ke moqosuoa oa pele nyeoeng ena kaha a qosoa ka ho ba le lengolo la lenyalo la lefoofo. Kajeno Moruti Jasong o hlahile khotla e le moqosuoa oa bobeli ea kenyelletsoang ho moqosuoa oa pele nyeoeng ena.
Ho ea ka lengolo la qoso, Jasong ka letsatsi le sa tsejoeng ke bochochisi sebakeng sa Ha Ts’iu Lepereng Mathokoane, o ile a etsa lengolo la bokunyata samokana a nyalisa ‘Mantsapo Leoma le Khunonyane Mokhethi feela Mokhethi a ichoelletse ka 2022.
Qoso e re sepheo sa moruti le moqosuoa oa pele e ne e le ho lumella moqosuoa oa pele ho ja le ho una molemo oa mafa a Mokhethi ka lengolo la leshano.
Kamora ho balloa litokelo tsa bona, moqosuoa oa pele ea neng a ipuella o ile a kopa beile tlas’a mabaka a latelang; hore ke mohlolohali ea nang le bana ba bararo. A tekela lekhotla hore ha a sebetse o phela ka sebaka sa bolulo seo batsoali ba hae ba mo sietseng sona ‘me o fumana feela M500 ea rente ka khoeli.
Mochochisi Motiki h’a ka ema khahlanong le kopo ea beile ‘me moqosuoa o ile a fuoa beile ea M400 eo a ileng a atleha ho e lefa. Moruti Jasong ka tsela e ts’oanang o fuoe beile ea M400 ‘me o atlehile ho e lefa le eena.
