HOLBERTON E TLISA METLA-E-TUTSOE EA MANGOLO
Leihlo la Basotho
La 17 Pherekhong 2024
Holberton School ke sekolo se thehiloeng naheng ea Amerika ‘me se na le lekalana Lesotho. Liofisi tsa sekolo li Machache, Khubetsoana. Sekolo se thehetsoe ho hlomella baithuti ka litsebo tsa bokamoso malebana le lithuto tsa likomporo (Computer Science).
Ka sehloohong sekolo se thusa baithuti ka litsebo tsa bopotiele ba marang-rang (Software Engineering) e le ho koala sekheo ho mananeo a thuto a bonahalang a siiloe ke linako haholo naheng ea Lesotho. Holberton School Lesotho e ikemiselitse ho tlisa phetoho e kholo ea digital transformation linaheng tsa lefatše kamora ho ithuta likhaello le masoba a bonahalang manane-thutong a likolo tse ling le koano Lesotho.
Ba mametse ka hloko
Mafelo a beke bookameli ba sekolo bo bile le ‘moka liofising tsa sona Machache, Khubetsoana ka sepheo sa ho hlalosetsa baithuti le batsoali ka litšebeletso le manane-thuto a fanoang ke sekolo. Mookameli oa sona, mofumahali ‘Mamonaheng Koenane o ile a hlalosa hore Holberton School ke sekolo sa lithuto tsa mahlale se thehiloeng naheng ea Amerika, Silicon Valley. A re eena ke mookameli oa lekala la sekolo koano Lesotho.
“Hajoale sekolo se fumaneha linaheng tse 23 lefatšeng athe koano Lesotho re ile ra phatlalatsa hore baithuti ba ka tlisa likopo ka ‘Mesa 2023 ‘me mokhahlelo oa pele oa baithuti o qalile lithuto ka Mphalane 2023.” Koenane oa hlalosa.
Ha a rapalatsa mokhoa oa tšebetso, o itse sekolo se thusa baithuti ho imatlafatsa le ho ba hlomella ka litsebo tse ba thusang ho khema le linako tsa sejoale-joale lithutong tsa mahlale a bopotiele ba marang-rang ka likomporo (Computer Science and Software Engineering).
O boetse a re Holberton School e shebana le ho thusa baithuti ka ho sebetsana le mananeo (project-based). A toboketsa hore ha baithuti ba phethetse lithuto sekolong sena, ba tsoa ba le malala-a-laotsoe ho etsa mosebetsi hohle lefatšeng. A ipiletsa ho Basotho ho nka monyetla ka sekolo sena bakeng sa ho ba bulela likhoro le mamati a mosebetsi.
“Linaheng tseo Holberton e sebelitseng nako e telele, baithuti ha ba phethela lithuto ba hiroa hang-hang; ke ka hona ba reng Holberton ke mosebetsi.” Koenene o rialo.
‘Mamonaheng Koenane, o re sekolo sa bona se fana ka lithuto le mangolo a khemang le linako
A teha ka mohlala hore setsi sa litšebeletso tsa sepaka-paka sa ‘muso oa Amerika, National Aeronautics and Space Administration (NASA) se atisa ho sebelisa baithuti ba Holberton ka tsela ea ho ba koetlisetsa mosebetsi oa sepaka-pakeng. A re nako ea boithuto e nka likhoeli tse leshome le halofo kaha ba sebetsa ka thata hoba sekolo se buloa ka 7am se koaloa ka 8pm.
Lithuto tse fanoang ke Computer Science and Software Engineering e le thuto e akaretsang (general programme). O hlalositse hore ba boetse ba na le mekhahlelo eo baithuti ba nkang makala a eona ka botebo (specialty programmes). Tsona ke Machine Learning, Augmented and Virtual Reality, Full-Stack, Web Development le Systems Programming and Block Chain. O boetse a hlakisa hore baithuti ba etsa mokhahlelo oa pele oa boithuto bo akaretsang (general) pele ba ka khetha thuto eo ba ithutelang eona ka botebo (specialization) e leng tse thathamisitsoeng kaholimo.
Ntlheng ea hore ho amoheloa baithuti ba mekhahlelo efe, Koenane o re ha ba khethe nku ka pere hore na motho o kena a na le lengolo lefe. A re kamohelo e laoloa ke ‘entrance exam’ e leng tlhahlobo eo motho a e ngolang pele a ka amoheloa sekolong sa bona. Baithuti ba amoheloa hararo ka selemo; Hlakola, Phuptjane le Mphalane.
Ba neng ba le ‘mokeng ba botsa lipotso
Leha ho le joalo, o re haeba moithuti a fihla a tšoere mangolo a Computer Science ba ka mo amohela mokhahlelong oa boithuto ba mangolo a specialization tlas’a lipehelo tsa bona. Leha ho le joalo, o re ba hlokometse hore baithuti ba kenang ba etsa specialization courses ba imeloa leha ba fihla ba tšoere mangolo a Computer Science kapa Software Engineering. Kahona, o re ba entse qeto ea hore baithuti bohle ba qale mokhahlelong oa pele o akaretsang pele ba ka etsa specialization.
“Ntho e etsang hore re fapane le likolo tse ling tsa thuto e phahameng kahara naha ke hore our curriculum is relevant, up-to-date, ‘me mangolo a rona a fana ka li-course tse attractive to the employer tseo a li batlang.
“Kahara Lesotho Strategic Development Plan 2 ho ngotsoe hore manane-thuto a fanoang kahara naha a siuoe ke linako (outdated).” Ke eena a hlalosa hore manane a thuto a likolo tsa Lesotho a salletse morao hoba lefatše le fetohile haholo ho tloha lilemong tse leshome tse fetileng.
“Haeba u batla mosebetsi lik’hamphaning tse khemang le linako joalo ka Google kapa Microsoft u ke ke oa hiroa hobane ba tseba hore u entse lithuto (courses) tsa khale tse hlokang boleng nakong ena.” O hlokomelisa joalo.
Mofumahali Koenane o supile hore bopaki ba sena bo’a bonahala kaha ho na le baithuti ba bangata ba lutseng fatše ho se mesebetsi.
Ho latela matla a Holberton, linaheng tse ling joaloka Afrika Boroa, ho na le k’hamphani e kopileng ho sebelisa sekolo seo ho ntlafatsa le ho chorisa litsebo tsa basebetsi ba eona. Maemong ao sechaba se koalletsoe hore se ka kena sekolo seo kaha se koetlisa basebetsi ba k’hamphani eo feela.
Rets’epile Shao, e mong oa barupeli
“Naheng ea Azerbaijan Holberton e butsoe ka Mphalane ka memo ea ‘muso oa mono. Naha ea Azerbaijan e kene letšolong la ho etsa serious digital transformation joale ba itse Holberton, tlohong le tlo re thusa. Ba entse sena ka ho lemoha tšebetso le matla a sekolo sa rona.” O rialo Koenane.
Koenane o re le bona e le Holberton School Lesotho ba atametsoe ke k’hamphani e ‘ngoe ea Amerika e bitsoang Magellan ‘me ba entse selekane le eona. “Ka ho tseba hore na re hlahisa baithuto ba boleng bo joang, Magellan selekaneng sa rona re lumellane hore ba emele baithuti bao re tla ba hlahisa kamora ho phethela lithuto hore ba tsebe ho ba hira mesebetsing ea bona. Ba sebetsa haholo Europe le Amerika.
Likomporo tsa sekolo lihlopheng tsa borutelo
O itse k’hamphani eo e tla thusa ka hohle-hohle hore baithuti ba tla fuoa mosebetsi ba tla thusoa ka litokomane hore ba fihle linaheng tseo ba il’o sebetsa. A re moo mosebetsi o ka etsoang motho a ntse a le hae (remote access) moo le teng ho tla sebetsoa joalo.
Potsong ea hore na sekolo se ngolisitsoe ka molao le lekala la thuto Lesotho, Koenane o arabile tjena: “Re mothating oa ho phethela ngoliso le Lekala la Thuto empa hajoale re fuoe tumello ea ho sebetsa kahara naha re le social enterprise organization kahara Lesotho. Re kenelletse tlas’a litemana tse kahara National Strategic Plan moo ‘muso o kopileng tlatsetso ho ba ka khonang kaha manane-thuto a fanoang likolong tsa lehae a siiloe ke linako, rona re kena mono. Litsi tse kang Holberton li kene ho tla thusetsa ho manane ano hoba a outdated, re etsa supplement moo manane-thuto a leng morao.” O li beha joalo.
Tankiso Fuma, e mong oa baithuti ba Holberton Lesotho
Ho sa le joalo, baithuti ba amohetsoeng sekolong sena ba ile ba hlalosa tsa leeto la bona. Tankiso Fuma o supile a thabetse monyetla oa ho ithuta Holberton. O re o kene a tšoere lengolo la A Level ho tsoa sekolong sa Lesotho-China Fellowship Collegiate ‘me o ile a amoheloa kamora ho ngola tlhahlobo ea kamohelo. “‘Na ke khethile ho tla ichorisa Holberton hoba ke hlokometse hore sekolo sena se khema le linako tsa joale. Ke khothalletsa batho hore ba se ke ba tsotella hore na ba na le background experience ea Computer Science kapa che. Hafeela ba ka pasa Entrance Exam ba tla amoheloa. The curriculum experience here is amazing.” Fuma o itsalo.
Mokonyane Nts’oereng
Mokonyana Ntšoereng eena o boletse a kene sekolong Holberton a tsoa Vaal University of Technology moo a ithutetseng Computer Science teng. “Mabaka a ntlisitseng mona ke hore re sokola mosebetsi, kaha ke qetile ka 2010 ‘me ke batla ho ipeha ho standard sa ho batla mosebetsi hohle lefatšeng e seng Lesotho feela. Sekolo sena se relevant haholo manane-thutong. Nkile ka sebetsa ‘musong mona feela ke sebetsa mosebetsi o sa amananeng le boithuto ba ka. Taba eo e ne ntšoenya empa Holberton e mpuselitse temeng.” Ntšoereng o phethela litaba tsa hae.
