MABAKA A HO HULA MASOLE HO MOKHOTHU A HLAHELLA
Ka Moipone Makhemeng
La 18 Pherekhong 2023
Bahlomphehi ba baholo ‘musong joaloka matona, batlatsi ba matona hammoho le moeta-pele oa bohanyetsi paramenteng har’a ba bang, ba lokela ho ba le balebeli ka molao.
Ho ea ka tokomane ea molao e bitsoang LEGAL NOTICE NO. 48 OF 2023, Members of Parliament Salaries (Amendment of Schedule), Regulations, 2023, moeta-pele oa bohanyetsi paramenteng o lokeloa ho fuoa balebeli ba babeli ba tšireletso. Hajoale moeta-pele oa Democratic Congress (DC), Mathibeli Mokhothu ke eena moeta-pele oa bohanyetsi paramenteng.
Ho sa le joalo, keta-pele ea DC e re Mokhothu o amohuoe balebeli ba masole ho tloha ha Pherekhong e thoasa.
Motlatsi oa seboholi oa DC, monghali Moeketsi Shale o tiisitse litaba tsena. O boetse a bontša e se lekhetlo la pele moeta-pele oa bona a amohuoa masole kaha le ka Tšitoe ngoahola ho bile joalo.
Moeketsi Shale – Motlatsi oa Seboholi oa DC
Shale oa hlalosa: “Mohlomphehi moeta-pele oa DC o ile a nka leeto a leba Afrika Boroa. Hang ha a qeta ho tsamaea, ho ile hoa nkoa masole a katang ha hae keiting. O tsamaile a siile masole a mo lebelang a tsamaeang le eena hoba ‘muso oa sokolisa ha o lokela ho fa masole ao litsiane tsa ho etela naheng e ‘ngoe.
“Khetlong lena ho etsahetse hore ha LDF e lokela ho fetola balebeli ba ntate Mokhothu, pele bookameli ba sesole bo ka etsa joalo o ile a kopa hore pele ba mo fetolela masole, o batla ho teka lingongoreho tsa hae malebana le tšireletso ea hae. Eitse ha a re h’a khotsofalle masole a neng a a fuoe, kapa ho ne ho fetoloa a le mong, ba ile ba re ho molemo ba se hlole ba mo fa masole.” Shale o rialo.
Leha ho le joalo, Shale o boetse a tiisetsa koranta ena hore boemo ba moetapele oa bohanyetsi ka paramenteng bo lumella Mokhothu ho ba le balebeli ho latela molao. A bolela hape hore ke molao oa meropotso ea maparamente oa 2022 o lokisitsoeng ka 2023 – Members of Parliament Salaries (Amendment of Schedule), Regulations, 2023.
Moetapele oa DC, Mathibeli Mokhothu o amohuoe balebeli ke ‘muso
“Taba ea hore ebe Ntate Mokhothu o’a sireletsoa ha se tšebelisano-‘moho feela, it is law.” Shale o hlalosa joalo.
Ho ea ka tokomane ea molao, LEGAL NOTICE NO. 48 OF 2023, Members of Parliament Salaries (Amendment of Schedule), Regulations, 2023, moetapele oa bohanyetsi o na le tokelo ea ho ba le mongoli, mothusi oa hae, mohlokomeli oa ntlo, bakhanni ba babeli le balebeli ba babeli har’a tse ling.
Ho sa le joalo, Leihlo la Basotho le etetse raliphatlalatso oa Sesole, Lieutenant Colonel Sakeng Lekola, ho hlahisa maikutlo litabeng tsena empa a re litaba tseo li ka arajoa ke letona ofising ea Tona-Kholo, mohlomphehi Limpho Tau.
“Lintho tse joalo li ka botsoa mohlomphehi Tau.” Ho boletse Lieutenant Colonel Lekola.
Ka lehlakoreng le leng, Phala ea Tona-Kholo, Monghali Thapelo Mabote, o itse ‘muso ha o ikarabelle sebakeng sa ho beha le ho tlosa masole a katang matona.
Lehlakore la letona Tau ha le’a fumaneha kaha mohala oa hae o ne o khabola feela ho tloha maobane.
