VCL E TŠELA BARALI BA ‘BOLAILENG’ ‘MABONA KA METSI
Ka moqolotsi oa rona
La 5 ‘Mesa 2023
Barali ba qosoang ka ho fenetha ‘mabona ‘Masechache Martha Rasekoai (58) oa Masowe, Maseru ka ho mo khakhatha ka kharafu, Nthei Rasekoai (32) le ‘Mamphoka Rasekoai (25) ka la 25 Phupu 2022 ba tlohile Lekhotleng le Phahameng ba hoshola beke ea ho feta kamora hore Vodacom Lesotho eo ba ileng ba e qosa ka litaba tsa lefu la ‘mabona e ba qhalle matsoho le ho ba hasa ka metsi a batang.
Hajoale barali ba emetse nyeoe ba le hae kamora ho lokolloa ka beile ea M500 motho ka mong. Ha ba kopa beile ba ile ba bontša hore ntlo ea bo-bona e setse e le ‘ngoe le hore bana ba bona ba setse le metsoalle ea bona ‘me ba hloka ho ea ba hlokomela. Moahloli Tšeliso Mokoko o ile a ba lokolla ka beile ka la 31 Pherekhong 2023.
Mofu ‘Masechache Martha Rasekoai
Nyeoe khahlanong le VCL e ile ea hlahleloa Lekhotleng le Phahameng ke morali e moholo oa mofu – Nthei Rasekoai a batla hore Vodacom Lesotho e lokolle lirekote tsa mohala oa mofu tsa la 25 ho isa 27 Phupu 2022 e le ho tla paka hore ha se bona ba bolaileng ‘mabona.
Nthei lipampiring tsa lekhotla o bontšitse hore ba batla lirekote tseo ho tla li sebelisa e le bopaki hore ‘mabona o ile a koeteloa le ho fenethoa ke motho eo ba sa mo tsebeng. A re ke lirekote tseo tse tla senola hore bona ha ba khenathela mali matsohong a lefu la ‘mabona.
Ho ea ka sepolesa sa Ha Thetsane, ka la 26 Phupu 2022, barali kamora ho fenetha motsoali oa bona mohlomong bosiu ba la 25 Phupu 2022 ba ile ba tlaleha ‘mabona a nyametse sepoleseng athe nakong eo ba il’o tlaleha ba ne ba siile setopo se popometse ka tlung pele ba se kanyapa ba se akhela nokaneng ea ‘Mabolou Ha Tsolo.
Nthei ha a batla lirekote tsa mohala oa mofu o beha mabaka a hore hoseng hoa la 26 Phupu 2022 o ile a felehetsa ‘m’ae ka koloi a mo siea setopong sa litekesi hore a palame a ee mosebetsing oa hae ka toropong ea Maseru moo a neng a sebetsa e le Chief Development Officer, Lekaleng la Meralo ea Ntšetso-Pele (Ministry of Development Planning). Nthei o re shoalane e ile ea tšoara ‘m’ae a sa fihli lapeng ho tsoa mosebetsing ‘me o re ba ile ba fumana hore ‘m’ae ha ka ba fihla le mosebetsing.
Nthei o re fono ea ‘m’ae ho bonahetse ho na le motho ea kena-kenaneng le eona kaha e tsoile likurupung tse ‘maloa tsa WhatsApp ho kenyeletsa le ea lelapa. Ha ho hlake hore na Nthei o fumane fono ea ‘m’ae hokae kaha a itse o belaela a koetetsoe le ho khakhatheloa lefu ke ha-re-tsebe.
“Ke kopa lekhotla le khabane le laele VCL ho ntokollela lirekote tseo kaha ke tsona feela tse tlo bontša metsamao ea ‘m’e oa ka hore o ne a le hokae ekasitana le ho senola hore babolai ke bo-mang.” Ke eena lipampiring tsa lekhotla.
Ho sa le joalo, Mookameli oa Vodacom Lesotho, Mohale Ralebitso bopaking ba hae o hanane le Nthei a re ha ho ka moo VCL e ka mo lokollelang tseo a li batlang. Ralebitso ha a tšela Nthei ka metsi a batang o re lirekote tse ka fanoang ke bona li fuoa monga fono feela kapa litsi tsa tšireletso ka taelo ea lekhotla.
Ralebitso o bile a hlokomelisa Nthei hore bona e le VCL ha ba kate kapa ho lisa metsamao ea beng ba lifono empa ba boloka lirekote tsa hore fono e letselitsoe ke mang kapa e letselitse mang.
Moahloli ea neng a mametse nyeoe ena, Fumane Khabo o ile a lumellana le VCL hore barali ba ke ke ba lokolleloa lirekote kahona o ile a lahlela kopo ea Nthei matjoing a ba mo pitla ka ho mo laela hore a lefe VCL litšenyehelo tsa nyeoe.
