TLALEHO EA MORAO-RAO NTOENG EA MOZAMBIQUE
Ka Moqolotsi oa rona
La 31 Motšeanong 2023
Setsi se lisitseng maemo a ntoa ea marabele porofinsing ea Cabo Delgado Mozambique, Cabo Ligado se lokollotse tlaleho ea morao-rao ka boemo ba ntoa sebakeng seo. Ho ea ka tlaleho, litlhaselo tsa marabele li tsoela-pele literekeng tsa Muidumbe hammoho le Macomia.
Litlaleho li supa hape hore marabele a qalile ho khutlela literekeng tsa Meluco ekasitana le Nangade, moo masole a Lesotho a hlommeng kampo. “Mabopong a leoatle, lihlopha tsa marabele li bonoe li phela ka khotso le batšoasi-ba-litlhapi ntle le ho ba hlasela.
“Ka la 3 Motšeanong 2023, likhukhuni li ile tsa ipiletsa ho batšoasi-ba-lihlapi Pangane, Macomia li ba khothaletsa ho khaohana le masole a Mozambique kapa ho sebetsa le ’ona.
“Marabele a hlokomelisitse batho ba moo hore a ke ke a ba hlasela hafeela ba sa ikamahanye le ho sebetsa le masole. Sechaba sa moo se netefalitse se iphelela ka khotso le marabele.” Tlaleho e rialo.
Marabele a Mozambique
Ho sa le joalo, motseng oa Mandela, seterekeng sa Muidumbe masole a Mozambique a ile a nkana lekhara-khara le marabele ka la 3 Motšeanong 2023 moo ho ileng hoa bolaoa marabele a tšeletseng.
Matsatsi a mararo kamora moo, ntoa e ile ea qhoma mabopong a noka ea Messalo moo marabele a ileng a thulana le mahokela. Tlhaselong ena mahokela a mabeli a ile a thunngoa a lemala ‘me a potlakisetsoa Muidumbe toropong bakeng sa ho alafshoa ka litlhare le methokho ea setso.
Ka la 11 Motšeanong 2023, marabele a ile a tšoara sehoai se ntse se kotula libanana ka leboea ho letša la Nguri hona seterekeng sa Muidumbe; a mo khaola hlooho!
Ea neng a ntse a sebetsa le mofu o ile a lokolloa ka le reng a ee motseng ho bolella baahi hore ba itlhokomele kaha a teng moo.
Liqhomane tsa maiketsetso tse lengoang fatše ke marabele (Improvised Explosive Device – IEDs) e ntse e le bothata moo masole a Mozambique a lekileng ho fothola liqhomane tsena empa ka bomali-mabe lesole le ile la timela kamora ho phahloha hoa seqhomane se seng ha a mang a ile a lemala.
Motseng oa Matambalale moahi o ile a shoa nakong eo a lekang ho hlaola tšimong ea hae, ha seqhomane sa fatše se phahloha.
Ka la 14 Motšeanong 2023, marabele a ka bang 20 a ile a hlasela motebo oa sesole sa SADC o bitsoang Mihluri seterekeng sa Macomia moo sesole sa Afrika Boroa se lulang. Hang hoba masole a Afrika Boroa a arabele ka lithunya, marabele a ile a checha. Tlhaselo ena e makalitse balebelli ba ntoa kaha hangata marabele a atisa ho hlasela masole a Mozambique e seng a linaha tse ling moo.
Marabele khoeling ena a boetse a khutlela Nangade kamora ho furalla setereke seo ka la 15 Motšeanong 2023. Kamora moo marabele a ile a koetela batho ba 12 empa a ba lokolla ka taelo ea hore a hloekise kereke ea Islam e fumanehang motseng oo. A boetse a fana ka litaelo tsa hore baahi ba qobe ho sebetsa ‘moho le masole.
Ho feta mona, hona seterekeng sa Nangade, marabele a ile a ikhapela lijo; libanana le lalamuni eaba a khutlela morung.
Ho tlalehiloe ketsahalo e bolutu moo masole a Rwanda a thuntseng le ho bolaea motšoasi-oa-lihlapi ka phoso a nahana hore ke lerabele motseng oa Marere, seterekeng sa Mocímboa da Praia.
