SR EA MOJAPELA KE ‘FONGKONG’ – MOLETSANE
Ka Moipone Makhemeng
La 14 ‘Mesa 2023
Motlatsi oa Mongoli e Moholo oa mehleng oa lekhotla la Socialist Revolutionaries (SR) le tummeng ka lebitso la Kanana ea Basotho, monghali Thabiso Moletsane o ngotse lengolo le bulehileng ho litho tsa komiti ea mokha oo moo a bontšitseng ha lekhotla lena e le la bohata feela (fake) ebile moetapele oa lona a khantša borui.
Hajoale Moletsane ke setho feela sa mokha ona. Oa hlalosa lengolong:”Lekhotla la SR ke ‘fake’ kapa ‘fongkong’ ea democratic socialism. Molao oa motheo oa SR o totobatsa hore re tlo sebetsa ka leano la’ ha re ke jeng kaofela’ ka democracy (democratic socialism).
Balateli ba Kanana ea Basotho
“Kutloisiso le mekhoa eo re neng re tlo sebetsa ka eona (ideology) ho pholosa Basotho bofutsaneng ba nako e telele tlasa moruo oa capitalism le bokolone empa joale moetapele oa SR o fapohile ho chabisetsa Basotho ideology ena ho ba pholosa eaba o shebana le ho ikhabisa e le motho ka ho futuhela baetapele ba bang liea-le-moeeng.” Moletsane o ngotse joalo.
Mongoli o totobalitse hore moetapele oa lekhotla o thibetse lekhotla ho iphumanela bafani molemong oa tšebetso ea komiti e kholo empa leha ho le joalo, ha a fe lekhotla chelete le lisebelisoa.
Ha a tsoelapelele o toboketsa hore komiti e kholo e setse e le lekhabunyane leo moetapele a le khaketsang kapa le jang mafoforetsane a oang tafoleng ea hae. Moletsane o re chelete e bokelloang e kena mokotleng oa khoebo ea moetapele kaha ho thoe ho fokoletsoa moroalo oo ba sa o tsebeng.
Ho sa le joalo, mongoli o bontšitse hore ho na le litho tsa komiti tse phelisoang ke moetapele kaha li sebetsa khoebong ea hae ‘me ka lebaka la sena o lemoha hore ha ho mohla komiti e tla sebetsa hantle.
“Litho tsena ke makhabunyane a moetapele; a ke keng a thusa ho mo eletsa kapa ho mo thiba ha a kheloha. Ntho e ‘ngoe e bohloko ke hore ba bang ba qekisa ho fumana mekoloto khoebong ea hae”. Ana ke mantsoe a Moletsane lengolong.
Ha a fera litaba tsa hae o fane ka keletso ho moetapele hore a ikokobelletse tsamaiso ea lekhotla a sebetse le komiti e kholo ho etella-pele ho ea ka molao. A re moetapele a potlakele hore lekhotla le fumane chelete le lisebelisuoa le tsebe ho sebetsa.
“U eteletse lekhotla lena ka chelete e ngata le li sebelisuoa feela ka tsela e fosahetseng e entseng lekhotla lekhabunyane la hau. E nepahetseng ke hore u fe lekhotla chelete mokotleng oa lona.” Ke Moletsane ha a phethela litaba tsa hae.
Ho sa le joalo moqolotsi oa rona o ikopantse le monghali Tlohelang Aumane ea buileng lebitsong la mokha a supa hore ke hona ba ntseng ba araba lengolo la Moletsane ka mongolo ‘me kahona ha a ka hlahisa maikutlo.
SR e na le litulo tse peli Ntlong ea Bakhethoa ‘me maparamente ea eona ke moetapele Adv. Teboho Mojapela ea ileng a hlola lebatooa la Motete athe motlatsi oa hae mofumahali ‘Mamarame Matela o fumane setulo sa khekhethane.
