SOTHO KIDS E TLOTLA LITALENTA TSA BACHA
Ka Moipone Makhemeng
La 4 ’Mesa 2023
Mokhatlo oa Sothokids Culture Agency o abetse bacha ba ipabotseng ho tsa bonono, boqapi le boithabiso likhau mafelo a beke ka la 1 ’Mesa 2023 hoteleng ea Victoria, Maseru.
Mohlophisi oa Sothokids Culture Agency, Sebabatso Litlali o khothalitse bacha ho tiisa ka matla litalenteng tsa bona e le hore ba tle ba iphilise ka tsona. A re leha thuto e nkoa e le senotlolo sa bophelo empa bacha ba ka fumana bophelo litalenteng tsa bona tsa boqapi. Tšebeletsong ena balateli le barati ba ’mino ba ne ba ikhethela bahloli mahareng a ba neng ba qothisana lehlokoa mafapheng 13 a bonono, boithabiso le boqapi.
Har’a bahloli e bile Teboho ‘Crazy T’ Maphike – Sebini se hloahloa, Leeto ‘Tallest’ Habanyane – Ralifoto ea hloahloa, Keketso Koena – Moqapi oa liaparo. Moeketsi Fako – ‘Motlelara ea hloahloa oa monna ekasitana Ntate Fonya ea abetsoeng khau ea Lifetime Achiever.
Libini ka ho fapana li ile tsa hloella kalana ho thabisa ba neng ba le moo ‘me tsona e bile Omali Themba, Crazy T, Bobby Stringz, Tamia Phooko, Mora Mobu le ba bang! Athe batsoaki ba ‘mino bona e bile DJ Nelo le Moska. Ha batsamaisi ba mokete e bile Mlex ‘moho le Khebez Seatlana.
Hamorao e ile ea e-ba thabo e khaphatsehang ho barati le batšehetsi ba sebini Teboho ‘Crazy T’ Maphike ha a amohela mohope a o lebisa Leribe.
Ho sa le joalo, Leihlo la Basotho le ile la atamela Crazy T ho mo nonya maikutlo mabapi le tlotla eo a e fumaneng ea ho khethoa e le sebini se hloahloa.
Crazy T o phahamisa mohope
Puisanong le eena o itse ke letsoalloa la Leribe ‘me leeto la hae selika-likoeng sa ‘mino le qalile selemong sa 2016 lehoja a ile a fumana setumo ka 2019. Hamorao o ile a sebetsa le Chereh Sputswe ba ntša setlabolane se bitsoang ‘Sponono’. Crazy T o re ha se sebini feela ebile ke moqapi le sengoli sa lithothokiso.
Ho ea ka eena, tlholisano ha e ea ba bobebe kaha a ne a pannoe le libini tse hloahloa haholo joaloka Eska Ponto le Omali Themba bao esale ba hapile setumo ho tloha ngoahola ka pina ea Mahali. O re kahlolo o fumane e le e nang le ponaletso kaha ho ne ho sebetsoa ka likhetho. Crazy T o bontša hore nako eo a bitsoang a phatlalatsoa e le mohloli o ile a hloka matla ke thabo le letsoalo. O re o hlolletsoe haholo ke lerato leo a le fumaneng ho tsoa sechabeng ‘me sena se mo file morolo haholo.
“Leeto le tsoelapele ka matla ‘me moo mahlo a ka a lebileng ke ho ea hapa khau ea grammy – Grammy Award.” Ke Crazy T a beha toro ea hae.
Ha a fera o ile a fetisetsa liteboho tsa hae ho barati le batšehetsi ba ‘mino oa hae.
“Ke leboha Captain Dash hoba o ile a nkuka a nkisa lenaneong le ho bona hore ke hatisa ‘mino oa ka. Ke lebohe hape Reitumetse Makara ea ileng a rata mosebetsi oa ka ‘me a sebetsa le ‘na ho tloha ka 2017 hofihlela joale. Ka ho fetisisa ke leboha Sotho Kids ka ho mpha sethala sa ho pepesa talenta ea ka ea ‘mino. Ke sa siee morao mookameli oa ka ‘minong.” O lihella likhala joalo.
